Имрӯз дар толори калони Мақомоти иҷроияи ҳокимияти давлатии шаҳри Хоруғ ба муносибати қабули қатъномаи Созмони Милали Муттаҳид таҳти унвони “Даҳсолаи байналмилалӣ оид ба таҳкими сулҳ барои наслҳои оянда, солҳои 2027 – 2036” ва Рӯзи Ваҳдати миллӣ, бо иштироки кормандони идораву муассисаҳои шаҳрӣ, фаъолони шаҳр, собиқадорон, ходимони дин ва дигар қишрҳои ҷомеа ҳамоиш баргузор карда шуд.

Дар оғози ҳамоиш раиси шаҳри Хоруғ Назарзода Ризо Шодӣ ҳамаи иштирокдоронро ба муносибати қабули қатъномаи Созмони Милали Муттаҳид таҳти унвони “Даҳсолаи байналмилалӣ оид ба таҳкими сулҳ барои наслҳои оянда, солҳои 2027 – 2036”, ки ташаббуси навбатии кишвари азизамон таҳти сиёсати дурандешонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мебошад ва 29 - солагии Рӯзи Ваҳдати миллӣ табрику муборакбод намуда, аз хизматҳои хастанопазири Пешвои муаззами миллат муҳтарам Эмомалӣ Раҳмон ёдовар шуданд.

Дар фарҷоми ҳамоиши филми ҳуҷҷатӣ вобаста хизматҳои шоён ва шабонарӯзии Пешвои муаззами миллат, фарзанди фарзона ва Қаҳрамони Тоҷикистон муҳтарам Эмомалӣ Раҳмон пешкаши ҳозирин гардонида шуд.

Ёдовар мешавем, ки бегоҳии 25 июн Маҷмаи Умумии Созмони Милали Муттаҳид қатъномаи махсусро аз рӯи пешниҳоди Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон зери унвони “Даҳсолаи байналмилалии таҳкими сулҳ ба хотири наслҳои оянда” қабул намуд. Тавассути қатъномаи мазкур, давлатҳои узв уҳдадории муштараки худро ҷиҳати пешбурди сулҳ, муколама ва ҳамбастагии байни наслҳо ҳамчун пояҳои муҳимми таъмини некӯаҳволии наслҳои оянда тасдиқ карданд.

Дар қатънома ҳадафҳо ва принсипҳои Оинномаи СММ, ба вежа иродаи “наҷоти наслҳои оянда аз офати ҷанг” ва уҳдадории ҳалли мусолиматомези баҳсҳо бозтоб ёфтааст. Он инчунин аҳамияти Эъломия ва Барномаи амал оид ба фарҳанги сулҳро ҳамчун ваколати умумиҷаҳонӣ барои таблиғи фарҳанги сулҳ ва адами хушунат эътироф менамояд.

Ҳадафҳои асосии Даҳсола аз мусоидат ба таҳкими сулҳ, ташвиқи муколама ва мусолиҳа, инчунин, дастгирии таомул миёни наслҳо, аз ҷумла кӯдакон, ҷавонон ва пиронсолон, бо назардошти ниёзҳо ва манфиатҳои наслҳои оянда дар таҳияи сиёсат ва равандҳои қабули қарорҳо иборат мебошанд.