Имрӯз дар бинои Ҳизби Халқии Демократии Тоҷикистон ҳамоиши сиёсӣ ва маърифатӣ таҳти унвони “Фарҳанги сулҳи тоҷикон – намунаи сулҳ дар ҷаҳон” баргузор гардид.

Ҳамоиши мазкур ба муносибати қабул гардидани ташаббуси нави Ҷумҳурии Тоҷикистон таҳти унвони “Даҳсолаи байналмилалӣ оид ба таҳкими сулҳ барои наслҳои оянда, солҳои 2027–2036”, ки бо қатъномаи Маҷмаи Умумии Созмони Милали Муттаҳид қабул гардид, доир шуда, дар он муовини якуми Раиси Ҳизби Халқии Демократии Тоҷикистон Маликшо Неъматзода, кормандони Дастгоҳи Кумитаи Иҷроияи Марказии ҲХДТ, инчунин намояндагони кумитаҳои иҷроияи ҳизб дар шаҳру ноҳияҳои шаҳри Душанбе, аъзо ва ҷонибдорони ҳизб иштирок намуданд.
Маликшо Неъматзода муовини якуми Раиси Ҳизби Халқии Демократии Тоҷикистон зимни суханронӣ аз нақши сулҳу ваҳдат дар пешрафти давлат ва ҷомеа ёдовар шуд. Ӯ таъкид кард, ки сиёсати сулҳҷӯёнаи Тоҷикистон имрӯз дар сатҳи байналмилалӣ низ мавриди эътироф қарор гирифтааст.
Гуфта шуд, ки Тоҷикистон дар тули солҳои соҳибистиқлолӣ бо роҳбарии Пешвои миллат муҳтарам Эмомалӣ Раҳмон тавонистааст таҷрибаи нодири таъмини сулҳу субот, ваҳдати миллӣ ва ҳамзистии осоиштаро дар арсаи байналмилалӣ муаррифӣ намояд. Гуфта шуд, ки ин таҷриба имрӯз ҳамчун модели сулҳи тоҷикон мавриди омӯзиш ва таваҷҷуҳи ҷомеаи ҷаҳонӣ қарор гирифтааст. Қабули қатъномаи Маҷмаи Умумии СММ дар бораи эълон гардидани Даҳсолаи байналмилалӣ оид ба таҳкими сулҳ барои наслҳои оянда натиҷаи талошҳои пайгиронаи Тоҷикистон дар самти таҳкими фарҳанги сулҳ, таҳаммулгароӣ ва густариши ҳамкориҳои созанда байни давлатҳо мебошад.

Р. САМИЕВ, “ҶТ”