Имрӯз дар толори Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба қабули ташаббуси нави Ҷумҳурии Тоҷикистон таҳти унвони “Даҳсолаи байналмилалӣ оид ба таҳкими сулҳ барои наслҳои оянда, 2027–2036”, ки бо Қатъномаи Маҷмаи умумии Созмони Милали Муттаҳид тасдиқ гардид, ҳамоиши ҷавонон ва варзишгарон таҳти унвони “Эмомалӣ Раҳмон - ташаббускори сулҳи ҷаҳонӣ” баргузор гардид.

Дар ҳамоиши мазкур Шабнам Раҳимзода, мувони якуми раиси Кумитаи кор бо ҷавонон ва варзиш, Махфират Хидирзода, узви Комиссияи марказии интихобот ва раъйпурсии Ҷумҳурии Тоҷикистон ва ҷоизадори Бозиҳои олимпӣ Темур Раҳимов иштирок ва суханронӣ намуданд.
Нахуст Суруди миллӣ ба таври зинда сароида шуд.
Дар рафти ҳамоиш Шабнам Раҳимзода, мувони якуми раиси Кумитаи кор бо ҷавонон ва варзиш доир ба ташаббусҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки аз ҷониби Созмони Миллалӣ Муттаҳид қабул гардидаанд, суханронӣ намуд.
Зимни ҳамоиш таъкид карда шуд, ки қабули Қатъномаи Маҷмаи умумии Созмони Милали Муттаҳид таҳти унвони “Даҳсолаи байналмилалӣ оид ба таҳкими сулҳ барои наслҳои оянда, 2027–2036”, ки бо ташаббуси Президенти Ҷумҳурии Тоҷикистон пешниҳод гардид, дастоварди муҳими дипломатияи муосири тоҷик буда, аз нуфузу эътибори рӯзафзуни Тоҷикистон дар арсаи байналмилалӣ шаҳодат медиҳад.

С. ИБОДЗОДА, “ҶТ”