Боиси хушнудист, ки имрӯзҳо таваҷҷуҳ ва дастгириҳои пайваставу беназири давлату Ҳукумат, бахусус Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбат ба ятимону бепарасторон назаррас арзёбӣ гардида, бо мақсади таъмини шароити зиндагии арзанда, рушди баркамол ва соҳибилму соҳибмаърифат гардидани онҳо тамоми шароитҳои муосир фароҳам оварда шудааст.

Лозим ба ёдоварист, ки Пешвои миллат ҳамеша бо хислати нодири раъиятпарварии хеш дар фикри беҳбудии шароити зиндагии мардуми эҳтиёҷманд, ятимон, барҷомондагон ва шахсони бесаробону камбизоат буда, таваҷҷуҳи махсус зоҳир кардан ба ин табақаи ниёзмандро аз аҳли ҷомеа борҳо талаб менамоянд. Ва ҳамин аст, ки пайваста таъкид медоранд, ки “Ман ҳеҷ вақт ягон ятими куллро дар нимароҳ намемонам, меомӯзонам, тарбия мекунам ва ба ҳаёти мустақилона гусел менамоям”.

Дар партави гуфтаҳои боло, 13 ноябр, дар Муассисаи давлатии “Душанбе – плаза” бо ташаббуси Кумитаи кор бо ҷавонон ва варзиши назди Ҳукумати кишвар ва сарпарастии Президенти федератсияи футболи Тоҷикистон, муҳтарам Рустами Эмомалӣ ба хотири арҷгузорӣ ба дастгириҳои доимии Пешвои миллат ба ятимон ва бахшида ба Рӯзи Президент таҳти унвони “Пешвои миллат рамзи иттиҳоду сарҷамъӣ ва саодату осудагии мо ҷавонон” ҳамоиши ҷумҳуриявии ятимони кулл баргузор гардид.

Дар ҳамоиш роҳбарияти Кумитаи кор бо ҷавонон ва варзиш ва 160 нафар ятимони кулле, ки дар муассисаҳои олии пойтахт таҳсил менамоянд, ширкат варзида, вобаста ба дастгириҳои Роҳбарияти олии кишвар суханронӣ намуданд.

Аҳтам Абдуллозода, раиси Кумитаи кор бо ҷавонон ва варзиш зимни суханронии хеш қабл аз ҳама кулли иштирокдорони ҳамоишро ба Рӯзи Президент табрику муборакбод гуфт. Раиси Кумита аз хизматҳо ва дастгириҳои Пешвои миллат нисбат ба ятимону бепарасторон ёдовар шуда, саҳми эшонро дар ҳифзу дастгирии табақаҳои ниёзманди мамлакат, аз ҷумла ятимон бесобиқа арзёбӣ карданд. Ӯ аз ҷумла афзуд, “давлату ҳукумати кишвар бо сарварии Пешвои миллат ҳанӯз аз солҳои аввали соҳибистиқлолӣ ҳифзи иҷтимоии гурӯҳҳои ниёзманду осебпазири аҳолиро ҳамчун самти асосии сиёсати худ муайян намуда, фароҳам овардани шароити таҳсил ва кору фаъолиятро барои худ ҳадафи муҳимтарин қарор додааст. Пешвои миллат аёдати шахсони яккаву танҳо, табақаҳои ниёзманди ҷомеа, ғамхорӣ ба ятимону бепарасторонро аз фазилатҳои неки инсонӣ меҳисобанд. Дар ин замина давоми солҳои Истиқлолият бо мақсади нигоҳубини ятимон ва дар шароити хонаводагӣ ба воя расонидани кӯдакону наврасон садҳо нафар кӯдак аз ҷониби шахсони хайрхоҳ ба фарзандӣ қабул карда шудаанд ва шахсоне, ки бо меҳру муҳаббати беандоза ва эҳсону парасторӣ таълиму тарбияи кӯдакони ятимро ба ӯҳда гирифтаанд, амали савоберо ба анҷом мерасонанд. Бо мақсади амалӣ намудани ин самт давлат ва Ҳукумати Тоҷикистон то имрӯз чораҳои заруриро андешида истодааст ва солҳои охир кӯмак ба ин гурӯҳҳои аҳолӣ ба як амали хайр ва қарзи имониву виҷдонии ҳар як фарди солимфикру хайрхоҳи ҷомеаи мо табдил ёфтааст”.

-Раҳму шафқат ба ниёзмандон, сила кардани сари ятимону шод кардани дили ранҷурон ва дастгириву нигоҳубини маъюбону камбизоатҳо яке аз хислатҳои азалии мардуми тоҷик маҳсуб шуда, аз фарҳангу тамаддуни пурғановати миллати мо сарчашма мегирад. Гузаштагони соҳибфарҳанги мо дар осори пурғановати худ дасти ёрӣ дароз намудан ба эҳтиёҷмандонро аз ҷумлаи рисолатҳои ҷавонмардӣ шумурдаанд. Аз ин лиҳоз, ҳар боре, ки хабари сарпаноҳу сарпарасти ғамхор ёфтани ятимеро дар ин ё он гӯшаи диёрамон мешунавам, вуҷудамро як ҷаҳон хурсандӣ фаро мегирад. Зеро фарзанд хондани ятим ва дар муҳити хонавода ба воя расонидани ӯ амали ниҳоят хайру савоб мебошад. Давлату Ҳукумати Тоҷикистон дар навбати худ барои ғамхорӣ ба ятимон ва таълиму тарбияи онҳо аз ҳамаи имкониятҳо истифода мекунанд. Маҳз дар натиҷаи ҳамин саъю талошҳои пайваста, солҳои охир ҳаҷми маблағгузорӣ аз буҷет барои таъминоти муассисаҳои таълиму тарбияи ятимон афзоиш ёфта истодааст, - гуфт дар идомаи суханронии хеш раиси Кумита.

Дар рафти чорабинӣ аз ятимони кулл даъват ба амал оварда шуд, ки онҳо бояд дар баробари ғамхорӣ ва дастгириҳои пайвастаи Сарвари давлат дониш андӯзанду дар ҳимояи манфиатҳои давлатӣ омодаву устувор бошанд.

Дар идомаи чорабинӣ ширкаткунандагони ҳамоиш барои дастгирӣ ва ғамхориҳо ба роҳбарияти Кумитаи кор бо ҷавонон ва варзиш изҳори миннатдорӣ намуда, иброз доштанд, ки тамоми кӯшишу ғайрати худро баҳри он равона месозанд, ки ҳамчун ҷавонони бонангу ори миллат паҳлӯ ба паҳлӯи ҳам истода, бо корҳои созандагию бунёдкорӣ, ахлоқу одоби намунавӣ, инсондӯстию ватанпарварӣ ва муборизи ҳақиқии даврони хеш ҳамеша номбардори ин Ватану ин миллат бошанду ҳамеша бо баҳои хубу аъло таҳсил намуда, бо ахлоқи намунавӣ дар ояндаи миллату давлат саҳми арзандаи худро гузоранд. Ва арҷгузорӣ ба муқаддасоти миллӣ, гиромӣ доштани хоку оби диёр ва дӯст доштани Ватани биҳиштосоро шиори ҳамешагии хеш қарор диҳанд.

Асрорзода Убайдулло, донишҷӯи Донишгоҳи молия ва иқтисоди Тоҷикистон бо шукргузорӣ аз даврони соҳибистиқлолӣ ва қаноатмандӣ аз дастгириҳои пайвастаи Пешвои миллат гуфт: “Бо ҳукми тақдир гарчанде ятим монда бошем ҳам, ҳеҷ гоҳ худро ятиму бепарастор ҳис наменамоям. Зеро имрӯз дар зери сиёсати ғамхоронаи Пешвои миллат мо - ятимон ҳеҷ мушкилӣ надорем. Имрӯз тамоми шароиту имконот ҷиҳати илмомӯзии мо муҳаёст. Ҳеҷ ятим бояд худро танҳо наҳисобад, зеро имрӯз нигоҳи падаронаи Президенти кишвар ба мо хуб буда, ҳамеша ва дар ҳама ҳолат дастгири мо - ятимон мебошанд. Аз ин лиҳоз, моро мебояд бо шукргузорӣ аз сиёсати ятимпарваронаи давлату миллат ба қадри ин неъматҳо расидагӣ кунем”.

Раҳимов Султонмурод, донишҷӯи Донишкадаи тарбияи ҷисмонӣ ва варзиш Рӯзи Президентро ба кулли иштирокдорон муборакбод намуда, гуфт, ки ин санаи таърихӣ барои ӯ хеле муқаддас ва гиромӣ аст. “Бекасӣ барои ҳама душвор аст. Агарчи ман ятими куллам, аммо то ҳол боре ҳам инро фикр накардам, ки ман бекасам. Бекас нафареро мегӯянд, ки дармондаву зор аст ва барои ҳалли мушкилиҳояш дар нимароҳ танҳо мемонад. Ғамхорӣ ва иқдомҳои наҷиби Пешвои миллат бошанд, ин эҳсоси манфиро аз сари мо дур кардааст ва аз ягон бобат танқисӣ намекашем. Аз ҳамин лиҳоз моро мебояд ба таври ҳамешагӣ аз ин марди наҷиб шукргузор бошем”.

Дар рафти чорабинӣ чанд тан аз иштирокдорони дигар низ доир ба ғамхориҳои падаронаи Пешвои миллат изҳори сипос намуда, иброз дошанд, ки маҳз ин дастгириҳост, ки мо ба ҳама хоставу ҳадафҳоямон мерасему аз ягон ҷиҳат камбудӣ надорем ва боре ҳам худро танҳо ҳис накардаем.

Дар фарҷоми чорабинӣ аз ҷониби ташкилкунандагони ҳамоиш ба иштирокчиён туҳфаҳои хотиравӣ тақдим карда шуданд.