Ҷавонест дӯстдори фанни информатикаву барномасозӣ ва ихтироот. Майл дорад ба варзиши навъи футбол ва шиноварӣ. Машғул мегардад ба онҳо бо даст додани вақт.

Дилбоз Сафаров аст мухотаби нигоштаи мо. Ӯ айни замон донишҷӯи курси чоруми Донишгоҳи техникии Тоҷикистон ба номи М.Осимӣ мебошад.

Аз хурдӣ орзуи духтур шуданро дошт. Он вақт фанҳои химия ва физикаро хеле дӯст медошту онҳоро нағз меомӯхт. Аммо рӯзе, ки бори аввал бо фанни информатика ошно гардид, фикраш дигар шуд. Тавре худи ӯ он замонро ба ёд меорад: “То синфи нуҳум компютер надоштам. Бори аввал вақте устод фанни информатикаро гузаштанд, барномасозӣ бис-ёр писандам омад. Чун амакам компютер дошт, ба назди он кас рафта, бо компютер кор мекардаму кӯшиши барнома сохтан менамудам. Билохира, бо дастгирии амакам соҳиби компютер гаштам. Аз он вақт барномасоз шудан хос-там”.

Ӯ мегӯяд: “Замоне ки ягон барнома сохтан мехостаму зимни он ягон нофаҳмӣ пайдо мешуд, бисёр нороҳат мешудам. Тули чанд рӯз ё ҳафта онро ҷустуҷӯ мекардаму дар охир онро пайдо мекардам. Он замон бисёр хушҳол мешудам. Онҳо лаҳзаҳои хотирмони мананд. Хушбахтона, ҳозир лаҳзаҳои ғамгинӣ қариб ки надорам”.

Ӯ ба наздикӣ, аниқтараш аз санаи 15 то 20 апрели соли ҷорӣ дар Олимпиадаи дуюми байналмилалӣ оид ба информатика, ки дар Донишгоҳи байналмилалии нафту гази Туркманистон ба номи Ягшигелди Какаеви шаҳри Ашқобод баргузор гардид, иштирок карда, миёни 350 нафар иштирокчӣ сазовори ҷойи дуюм шуд.

Қаҳрамони мо доир ба озмуни мазкур чунин иброз дошт: “Дар олимпиадаи мазкур аз 70 муассисаи таълимии кишварҳои Ҷумҳурии Федералии Олмон, Федератсияи Русия, Тоҷикистон, Турк-манистон, Озорбойҷон, Туркия, Эрон, Қатар ва дигар кишварҳо иштирок намуданд. Олимпиада тибқи талаботи баргузории он дар якчанд зина давоми ду рӯз идома ёфта, пас аз он ҷамъбаст гардид. Пайваста кӯшиш кардам, ки ғолиб гардам. Ҳарчанд каме душвор буд, вале хушбахтона заҳматҳоям натиҷа доданду тавонистам, ки мақомеро ишғол намоям”.

Ӯ инчунин иштирокчии чандин олимпиадаву озмунҳои дигар мебошад.

- Ҳанӯз аз замони синфи ҳафтум буданам дар озмунҳои монанди фанҳои физика ва математика, химия ва баъдтар информатика иштирок мекардаму сазовори ҷойҳои намоён гардида будам. Аз оғози давраи донишҷӯи низ. Соли 2023 дар озмуни ҷумҳуриявии “Барномасози беҳтарин” сазовори ҷойи дуюм, соли 2024 дар озмуни ҷумҳуриявии “Муҳаққиқ ва ихтироъкори ҷавон” ғолиби ҷойи дуюм ва ахиран моҳи апрели соли ҷорӣ дар Олимпиадаи дуюми байналмилалӣ оид ба информатика иштирок намуда, сазовори ҷойи дуюм гаштаам, - гуфт бо хушнудӣ.

Ӯ нақши волидонашро дар муваффақиятҳои худ хеле муҳим мешуморад. Зеро онҳо барои таълиму тарбия ва таҳсили хуби фарзандашон тамоми шароиту имконоти лозимаро фароҳам оварданд.

“Ман аз волидонам, ки ҳамеша маро дастгирӣ менамоянд, миннатдорам. Чун ҳар вақт тасмими кореро мегирам, онҳо зид намебароянд, бараъкс аз он тарафдорӣ менамоянд. Ҳамзамон устодонам низ нақши муҳим бозидаанд. Чун сахтгириву заҳматҳои онҳо буд, ки дар ҳамаи озмунҳои иштирок кардаву то ҷое муваффақ шудам”.

Дилбоз баробари донишҷӯ будан, ҳамзамон айни ҳол дар ҶСК “Алиф Бонк” ба ҳайси барномасоз фаъолият менамояд. Инчунин, дар вақтҳои холигӣ ҳамроҳ бо устодонаш рӯи ихтирооти нав кор мекунад.

- Ҳамроҳ бо устодон чанд ихтироотро барномарезӣ дорем. Айни ҳол дар бораи онҳо чизе гуфта наметавонам. Чун онҳо дар ҳоли барномарезӣ ҳастанд. Яке аз онҳо ихтирои роботҳое, ки хӯрокро таҳвил медиҳанд. Ҳамчунин, клавиатураи худро сохтаам. Он назар ба дигар клавиатураҳо тугмаҳои кам дорад, вале функсияҳои зиёдро иҷро мекунад, - баён дошт ӯ.

- Ӯ донишҷӯест, ки дониши хуб дорад. Шогирди муваффақ ва беҳтарин аст. Айни ҳол чандин барномаҳои компютерии ӯ монанди “Китобдӯст” ва “Бозиҳои математикӣ” фаъолият доранд, - мегӯяд устодаш Абдунабӣ Қосимов.

Яке аз дӯстони наздику самимиаш Фирдавс Тошев аз шинохти худ чунин мегӯяд: “Дӯстии мо замоне оғоз гардид, ки ӯ ба гурӯҳи мо интиқол гирифт. Ӯ айни замон дӯсти наздик ва ҳамзамон ҳамкурси хуби ман мебошад. Зиёд мешавад, ки мо ҳар ду аз ҳамдигар чизҳои нафаҳмидаамонро мепурсему ҳамдигарро кӯмак менамоем. Ва бояд бигӯям, ки Дилбоз нафарест, ки дар дарсҳо ба ҳамагон ёрӣ мерасонад”.

Ӯ ҷодаи интихобкардаи худро идома додан мехоҳад ва нақшаҳои зиёде дорад.

- Пас аз хатми донишгоҳ таҳсилро дар зинаи магистратура дар донишгоҳи худамон идома додан мехоҳам, то дар озмунҳои дигар иштирок намояму парчамбардори кишвари азизам гардам. Инчунин, ният дорам, ки барномаҳои дигари ҷолибу шавқовар барои кӯдакон ҷиҳати омӯзиши беҳтару хубтар ҷорӣ намоем”, - гуфт дар охири суҳбат Дилбоз Сафаров.

Гулафшон КАРИМОВА, “ҶТ”