Дар доираи Форуми ҷумҳуриявии хизматчиёни ҳарбӣ ва ҷавонони синни даъватӣ, ки таҳти шиори “Пайравони Пешвои миллатем” рӯзи 31 октябр, дар боғи Ирам як чорабинии пуршукӯҳ баргузор гардид.

Дар чорабинӣ Дилноза Аҳмадзода, муовини раиси Кумитаи кор бо ҷавонон ва варзиш, сардори раёсати тарбия ва сиёсати Вазорати мудофиа генерал майор Дониёрзода Меҳваршо, мудирони бахшҳои ноҳиявии кор бо ҷавонон ва варзиш, собиқадорони соҳаи ҳарбӣ, афсарону сарбозон, намояндагони Дастгоҳи иҷроияи Президент, Кумитаи рушди сайёҳӣ ва ҷавонону волонтёрон иштирок карданд.

Дар қисмати аввали чорабинӣ сарбозон маҳорати ҷангии худро ба намоиш гузошта, аз худ маҳорати хуби варзишӣ нишон доданд. Дар қисмати дигар, ки аз суҳбат ва суханрониҳо иборат буд, қисме аз иштирокчиён баромад ва маърӯзаҳо карданд.

Дилноза Аҳмадзода, муовини раиси Кумитаи кор бо ҷавонон ва варзиш, дар суханронии худ зикр намуд, ки хизмат ба Ватан қарзи ҳар шаҳрванд буда, далериву ҷасурӣ ва ҷавонмардии ҳар нафари бо нангу номусро талаб мекунад.

“Хизмат дар сафи Қувваҳои Мусаллаҳ боиси ифтихору сарбаландист. Бояд ҷавононро ҳанӯз аз даврони мактабхонӣ ба хизмати Ватан омода кард. Дар мактабҳои миёна зарурати хизмати ҳарбиро амиқу дақиқ бояд омӯзонд. Ҳар ҷавон пас аз хатми мактаб бояд хизмат ба Ватанро вазифаи аввалиндараҷа донад. Барои насли ҷавон яке аз муҳимтарин мактаби обутоб хизмат дар сафи Қувваҳои Мусаллаҳи мамлакат аст. Маҳз дар ҳамин ҷо ҷавонписарон шуҷоату мардонагӣ омӯхта, муқаддастарин арзиши ҳаёт, дӯст доштан ва содиқона муҳофизат кардани хоки поки Ватани азизро ёд мегиранд,”- гуфт дар идомаи суханронии хеш Дилноза Аҳмадзода.

Генерал майор Дониёрзода Меҳваршо, сардори раёсати тарбия ва сиёсати Вазорати мудофиа саҳми ҷавононро дар Артиши кишвар назаррас арзёбӣ карда, гуфт: “Воқеан ҳам, Қувваҳои Мусаллаҳи кишвар зодаи даврони Истиқлолияти давлатӣ маҳсуб ёфта, боиси ифтихор аст, ки имрўз ба як сохтори муташаккил ва сипари боэътимоди Ватан мубаддал гаштаанд. Дар давоми беш аз ду даҳсолаи охир Артиши миллии мо ба мактаби тарбияи ватандўстиву ватандорӣ ва матонату мардонагӣ табдил ёфта, то имрўз дар сафҳои худ даҳҳо ҳазор ҷавонони обутобёфтаро ба камол расонидааст. Имрӯз ҷавонони бонангу номуси мо хуб дарк мекунанд, ки хизмат ба Ватан барои онҳо қарзи муқаддаси фарзандӣ ва рисолати мардонагист. Яъне хизмати ҳарбӣ нишонаи равшани эҳсоси ватандӯстӣ, дарки зарурат ва аҳамияти ҳимояи манфиатҳои давлат ва халқи Тоҷикистон мебошад”.

Дар идома маросими савгандёдкунии як зумра наваскарон баргузор гардида, ҳамчунин аз ҷониби аҳли санъат барномаи фарҳангӣ пешкаши иштирокчиён гардонида шуд.