19 октябри соли 2026 дар бинои раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар шаҳри Душанбе дар ҳамкорӣ бо Кумитаи кор бо ҷавонон ва варзиши назди Ҳукумати кишвар бахшида ба 35-солагии Истиқлоли давлатии Ҷумҳурии Тоҷикистон таҳти унвони “Нақши ҷавонон дар таҳкими Истиқлоли давлатӣ” ҳамоиши ҷавонон баргузор гардид. Дар чорабинии мазкур роҳбарият ва кормандони ҳарду ниҳод, инчунин омӯзгорону донишҷӯёни муассисаҳои таҳсилоти олии кишвар иштирок намуданд.

Чорабиниро муовини якуми директори Агентӣ, генерал-майори адлия Расулӣ Б. оғоз карда, қайд намуд, ки Истиқлолияти давлатӣ волотарин ва пурарзиштарин дастоварди таърихи навини давлатдории миллати тоҷик ба ҳисоб рафта, баҳри эҳёи арзишҳои миллӣ, таҳкими худшиносиву худогоҳии миллӣ, рушди давлатдорӣ ва муайян намудани роҳи минбаъдаи пешрафти кишвар заминаи устувор фароҳам меоварад, ки нақши ҷавонон дар ин раванд муҳим арзёбӣ мегардад.

Дар идома Сураҷ Чоршанбезода, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон баромад карда, перомуни арзиши Истиқлоли давлатӣ ва гиромидошти он сухан гуфт.

Гуфта шуд, ки танҳо ҷавонони боиродаву далер ва ватандӯст метавонанд, бо омӯхтани илмҳои муосир ва созандагиву бунёдкорӣ дар ҳифзи ин неъмати бебаҳо саҳмгузор бошанд.

Мақсади асосии чорабинӣ ба таври шоиста муаррифӣ намудани дастовардҳои Истиқлоли давлатӣ ба насли ҷавон ва таҳкими ҳисси худшиносиву худогоҳии миллӣ мебошад. Баргузории чунин ҳамоишҳо ҷавононро водор месозад, ки баҳри ҳимояи арзишҳои миллӣ ва пешрафти Ватани азиз талошҳои бесобиқа намоянд.