Мунтахаби Тоҷикистон оид ба санъати муҳорибаҳои омехта (ММА) дар нахустин иштироки ин намуди варзиш дар Бозиҳои осиёӣ натиҷаи назаррас нишон дода, бо иштироки се варзишгар ба финали мусобиқа роҳ ёфт.

Дар Бозиҳои ХХ осиёӣ, ки дар шаҳрҳои Айчи-Нагояи Ҷопон идома доранд, намояндагони Тоҷикистон дар се вазн барои ба даст овардани медали тилло мубориза хоҳанд бурд. Отабек Раҷабов дар вазни то 65 килограмм аз намуди Traditional MMA, Мирзобек Умаров дар вазни то 60 килограмм аз намуди Modern MMA ва Беҳрӯз Хуршедзода дар вазни то 71 килограмм аз намуди Modern MMA ба финал баромаданд.

Махсусан, пирӯзии Мирзобек Умаров дар нимфинали вазни то 60 килограмм бар намояндаи Покистон Асими Хон бо ҳисоби 3:0 ба ӯ роҳ ба финалро таъмин кард.
Отабек Раҷабов низ дар вазни то 65 килограмм ба финал роҳ ёфта, дар нимфинал бар намояндаи Қазоқистон Санжар Адилов бо ҳисоби 3:0 пирӯз шудааст. Бо ин натиҷа Адилов соҳиби медали биринҷӣ гардид, дар ҳоле ки Раҷабов муборизаро барои нишони тилло идома медиҳад.

Дар вазни то 71 килограмм бошад, Беҳрӯз Хуршедзода баъди натиҷаи баҳсбарангези рақобати нимфиналӣ ва баррасии эътирози ҳайати Тоҷикистон ба финал роҳ ёфт. Манбаъҳои охирини мусобиқа нишон медиҳанд, ки рақиби ӯ дар финал намояндаи Қазоқистон Қодирбек Шинбоев хоҳад буд.

Ҳамин тавр, Тоҷикистон дар нахустин иштироки ММА дар таърихи Бозиҳои осиёӣ якбора бо се варзишгар барои медалҳои тилло мубориза мебарад. Бозиҳои финалӣ дар шаш вазни ММА рӯзи 22 сентябр баргузор мешаванд. Ҷолиб аст, ки ММА дар Бозиҳои ХХ осиёӣ бори аввал ба барномаи расмии ин мусобиқа ворид шудааст. Шурои олимпии Осиё барои ин намуд шаш маҷмуи медал-чорто миёни мардон ва дуто миёни занон пешбинӣ кардааст.

Натиҷаи се варзишгари тоҷик дар марҳилаи ниҳоӣ барои мунтахаби кишвар имкони ба даст овардани чандин медали тиллоро фароҳам овардааст. Акнун таваҷҷуҳи мухлисони варзиши тоҷик ба рақобатҳои финалӣ равона хоҳад шуд, ки дар он Отабек Раҷабов, Мирзобек Умаров ва Беҳрӯз Хуршедзода барои қаҳрамонии Бозиҳои осиёӣ талош мекунанд.

Яҳё МАҲМАДНАБИЕВ, “ҶТ”