22–23 ноябр дар шаҳри Қазони Федератсияи Русия мусобиқаи кушоди байналмилалӣ оид ба гӯштини ҷудо таҳти унвони “Кубок Единства” бори аввал баргузор гардид.

Ин чорабинии варзишӣ даҳҳо варзишгарони наврасро аз кишварҳои гуногун гирди ҳам оварда, ба он мақоми байналмилалӣ бахшид.

Дар ин мусобиқа Тоҷикистонро варзишгари умедбахши наврас Сомон Турсунзода, дастпарвари “Клуби ҷудои Сомон” ва Клуби ҷудои “Ҳоҷӣ Шариф” намояндагӣ кард. Ӯ дар вазни 31 кг бо нишон додани маҳорати баланд ва омодагии ҷиддӣ тавонист шаш рақиби пурқувватро дар даврҳои пайдарпай мағлуб созад.

Сомон Турсунзода бо ин пирӯзии қотеъона медали тиллои мусобиқа ва ҳамзамон Ҷоми мусобиқаи кушоди байналмилалӣ “Кубок Единства”-ро ба даст овард. Ин дастоварди варзишӣ барои ҷудокори навраси тоҷик як муваффақияти назаррас ба ҳисоб рафта, ҷойгоҳи варзишгарони ҷавони кишварро дар арсаи байналмилалӣ боз ҳам мустаҳкам менамояд.

Яҳё МАҲМАДНАБИЕВ, “ҶТ”