Дар пойтахти Ҷумҳурии Узбекистон шаҳри Тошканд мусобиқаи байналмилалии ҷудо барои наврасону ҷавонон ҷамъбаст гардид.

Дар ин чорабинӣ, ки аз 28 то 31 май доир шуд, намояндагони Тоҷикистон натиҷаи назаррас нишон дода, соҳиби 12 нишони фахрӣ гардиданд. Дар миёни онҳо як медали тилло, шаш нуқра ва панҷ биринҷӣ мавҷуд аст.

Дар сабқатҳои синни наврасон аз Тоҷикистон 97 варзишгар иштирок карданд. Дар натиҷа се ҷудокор ба зинаи дуюми ифтихорӣ баромаданд. Муҳаммаданис Солеҳов дар вазни 55 килограмм, Исомиддин Қосимов дар вазни 60 килограмм ва Райҳона Розиқзода дар вазни 52 килограмм медалҳои нуқра ба даст оварданд. Ҳамчунин Армон Сафаров ва Шамил Исмоилов мутаносибан дар вазнҳои 60 ва 66 килограмм соҳиби ҷойҳои сеюм шуданд.
Дар рақобатҳои байни ҷавонон бошад, ҳайати Тоҷикистон аз 107 ҷудокор иборат буд. Александра Кан дар вазни то 57 килограмм ҳамаи рақибонашро мағлуб намуда, ба гирифтани нишони тилло даст ёфт. Ардашери Ҳамза ва Исмоил Бурҳонов дар вазнҳои 90 ва 100 килограмм бо медалҳои нуқра сарфароз гардиданд. Медалҳои биринҷиро Мадина Қурбонзода, Ёсин Бобокалонов, Муҳаммадрофеи Ҳабибулло ва Панҷшер Муъминов ба даст оварданд.
Бино ба маълумот, дар мусобиқаи наврасон 660 варзишгар аз 11 кишвари Осиё ширкат намуданд. Дар бахши ҷавонон бошад, 503 ҷудокор аз 12 давлат барои ҷойҳои ифтихорӣ мубориза бурданд.

Яҳё МАҲМАДНАБИЕ, “ҶТ”