Мутахассиси маъруфи ҷудои ҷаҳон Ираклий Узнадзе ба ҳайси сармураббии тими миллии ҷудои Тоҷикистон таъин гардид. Ин тасмим имрӯз дар доираи татбиқи нақшаҳои рушди минбаъдаи ҷудо дар кишвар ва баланд бардоштани сатҳи рақобатпазирии варзишгарони тоҷик гирифта шудааст.

Узнадзе аз зумраи мураббиёни соҳибтаҷриба ва муваффақи арсаи байналмилалӣ маҳсуб шуда, солҳои гуногун роҳбарии дастаҳои мунтахаби Гурҷистон ва Туркияро бар уҳда доштааст. Дар давраи фаъолияти ӯ шогирдонаш дар Бозиҳои олимпӣ, чемпионатҳои ҷаҳон ва Аврупо, инчунин мусобиқаҳои бонуфузи силсилаи Grand Slam, Grand Prix ва Masters ба дастовардҳои назаррас ноил гардида, соҳиби медалҳои зиёд шудаанд.

Хизматҳои касбии ин мутахассиси варзида борҳо қадрдонӣ гардидаанд. Ӯ ду маротиба аз ҷониби Иттиҳоди Аврупоии Ҷудо беҳтарин мураббии қораи Аврупо эътироф шуда, ҳамчунин соҳиби унвони беҳтарин мураббии Гурҷистон мебошад.

Интизор меравад, ки бо роҳбарии ӯ сатҳи омодагии варзишгарон боз ҳам беҳтар гардида, ҳайати мунтахаби кишвар барои иштирок дар мусобиқаҳои сатҳи ҷаҳонӣ бо неруи бештар омода шавад.

Ҳадафи асосии фаъолияти сармураббии нав омода намудани ҷудокорони рақобатпазир, таҳкими ҳайати мунтахаб ва ба даст овардани натиҷаҳои арзанда дар мусобиқаҳои байналмилалии бонуфуз мебошад.

Яҳё МАҲМАДНАБИЕВ, “ҶТ”