Ҳамасола 23 июн ба муносибати барқарор шудани ҳаракати олимпӣ дар шакли муосир дар ҷаҳон Рӯзи байналмилалии олимпӣ таҷлил мегардад.

Дар робита ба ин сана имрӯз, Кумитаи миллии олимпии Ҷумҳурии Тоҷикистон дар ҳамкорӣ бо Кумитаи кор бо ҷавонон ва варзиши назди Ҳукумати ҷумҳурӣ дар сар то сари кишвар мусобиқаву бозиҳои гуногуни варзишӣ ташкил намуд. Аз ҷумла, Рӯзи байналмилалии олимпӣ дар Тоҷикистон бо машқҳои пагоҳирӯзӣ дар ҷойҳои фарҳангиву марказҳои шаҳру навоҳии мамлакат оғоз гардид.

Ба муносибати Рӯзи байналмилалии олимпӣ ҳамчунин бо иштироки варзишгарони шаҳри Душанбе дар Донишкадаи тарбияи ҷисмонии Тоҷикистон ба номи Саидмуъмин Раҳимов мусобиқаҳои чавгонбозӣ, вазнбардорӣ, гуштини миллӣ, дар Варзишгоҳи марказии шаҳри Душанбе варзиши сабук, дар Маҷмааи варзишии “Динамо” мусобиқаи қайиқронӣ, дар Кӯли “Ҷавонон” мусобиқаи шиноварӣ ва дар Мактаби ҷумҳуриявии олии варзишӣ оид ба намудҳои гӯштин бошад, мусобиқаҳои гӯштини озод, юнонӣ-римӣ, ҷудо ва баскетбол баргузор карда шуд.

Ёдовар мешавем, ки моҳи январи соли 1948 дар иҷлосияи 42-юми Кумитаи байналмилалии олимпӣ қарор қабул шуд ва моҳи июни соли 1894 дар шаҳри Парижи Фаронса Конгресси байналмилалӣ оид ба проблемаҳои тарбияи ҷисмонӣ доир гашт, ки дар он намояндагони 12 давлат иштирок карданд. 23 июн асосгузори ҳаракати олимпии муосир Пйер де Кубертен суханронӣ намуд. Дар баромадаш ӯ ҳозиринро бо асосҳои Бозиҳои олимпӣ шинос кард. Маҳз ҳамин сана ҳамчун Рӯзи байналмилалии олимпӣ интихоб шуд, ки мақсад тарғиби варзиш дар тамоми ҷаҳон ва ҷалби одамон, новобаста аз синну сол, ҷинс ва имконияти онҳо ба варзиш мебошад.

Аввалин Бозиҳои олимпии муосир соли 1894 дар Юнон бо иштироки 241 варзишгар аз 14 давлат баргузор шуд. Онҳо аз рӯи 9 намуди варзиш барои медалҳо рақобат намуданд. Баъд аз бештар аз 100 сол, дар Бозиҳои олимпии соли 2004 дар Юнон наздики 15 000 варзишгар аз 202 давлат дар 28 намуди варзиш ширкат карданд.

Дар Муоҳидаи олимпӣ омадааст: “Мақсади ҳаракати олимпӣ тарбияи ҷавонон ба воситаи варзиш дар руҳияи ҳамдигарфаҳмӣ ва рафоқат ва ба ин восита дунёи беҳтар ва осуда сохтан мебошад”.

Чорабиниҳои асосии Рӯзи олимпӣ марафони дав ба ҳисоб меравад. Дар ин рӯз, ҳамчунин мусобиқаҳои дигари варзишӣ, семинарҳо, чорабиниҳои фарҳангӣ, шоу-барномаҳо, мулоқот бо қаҳрамонҳо ва ҷоизадорони Бозиҳои олимпӣ ва ғайра баргузор мешаванд.

Рӯзи байналмилалии олимпӣ ҳамасола дар аксар кишварҳои олам, аз ҷумлаи дар Тоҷикистон ин рӯз бошукӯҳ таҷлил мегардад ва ба ин муносибат дар сартосари мамлакат чорабиниву мусобиқаҳои гуногуни варзишӣ доир мегардад. Чунончи имрӯз дар тамоми гушаву канори Тоҷикистон чорабиниву мусобиқаҳои варзишии гуногун идома доранд.

Шаҳбози АСОМИДДИН, “ҶТ”