Имрӯз зери ин унвон дар доираи нақша – чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба ифтихори Рӯзи варзишгарони Тоҷикистон чорабинии бошукӯҳи идона доир гардид.

Тибқи иттилои маркази таҳлил ва иттилооти Кумитаи кор бо ҷавонон ва варзиш, дар чорабинии мазкур Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Маликшо Неъматзода, муовини якуми Раиси Ҳизби Халқии Демократии Тоҷикистон, масъулин ва собиқадорони соҳаи варзиши кишвар, роҳбарони вазорату идораҳо, мураббиёни муассисаҳои тайёрии варзишӣ, варзишгарон ва ғолибону ҷоизадорони мусобиқаҳои сатҳи байналмилалӣ иштирок намуданд.

Нахуст, Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон суханронӣ намуда, ҳозирини маросим, бахусус собиқадорон ва варзишгарони кишварро, ки шарафи варзиши мамлакатро дар арсаи байналмилалӣ баланд бардоштаанд, табрик намуд.

Гуфта шуд, ки соҳаи варзиш зери таваҷҷуҳи доимии Ҳукумати Ҷумҳурии Тоҷикистон қарор дошта, самти афзалиятнок ба ҳисоб меравад. Ҳамин аст, ки ҳамасола заҳмату талош ва меҳнатҳои масъулини соҳаи варзиш ва варзишгарони мамлакат қадрдонӣ мешавад. Соҳаи тарбияи ҷисмонӣ ва варзиш яке аз рукнҳои арзишмандтарин ва муҳимтарини ҷомеа барои тарбияи насли наврас ба ҳисоб меравад. Зеро мақсади асосии тарбияи ҷисмонӣ ва варзиш танҳо иборат аз таҳкими саломатии инсон нест, балки он бо тарбияи меҳнатӣ, ақлӣ, ахлоқӣ ва эстетикӣ низ пайванди ногусастанӣ дошта, муаррифгари давлату миллат дар арсаи байналмилалӣ мебошад.

Дар идома собиқадорони соҳаи варзиш, мураббиён ва варзишгарони муваффақи кишвар бо туҳфаҳо ва мукофотҳои пулӣ қадрдонӣ гардиданд.

Дар охир барномаи фарҳангӣ пешкаши ҳозирин гардонида шуд.