Дастаи мунтахаби футзали Тоҷикистон дар даври сеюми марҳилаи интихобии Ҷоми Осиё-2026 дар гурӯҳи “С” аз тими миллии Ҷопон бо ҳисоби 1:3 шикаст хурд.

Ин бозӣ шаби 24-уми сентябр дар Қасри теннис ва маҷмааи варзиши обии шаҳри Душанбе доир гардид. Дастаи мунтахаби футзали Тоҷикистон ба зами шикаст аз Ҷопон аз мақоми дувуми ҷадвал ба қисми ниҳоии Ҷоми Осиё-2026 роҳ ёфт.

Ёдовар мешавем, дар даври якуми марҳилаи интихобии Ҷоми Осиё-2026 дар гурӯҳи “С” Ҷопон бар Камбоҷа бо ҳисоби 5:0 ва Тоҷикистон бар Макао бо ҳисоби 10:2 пирӯз шуда буданд.

Дар даври дуюми марҳилаи интихобии Ҷоми Осиё-2026 бошад, Тоҷикистон тими миллии Камбоҷаро бо ҳисоби 7:1 мағлуб кард.
Ин бозӣ шаби 22-юми сентябр дар Қасри теннис ва маҷмааи варзиши обии шаҳри Душанбе доир гардида буд. Футзалбозони тоҷик дар нимаи аввали бозӣ ба дарвозаи меҳмонон чаҳор гол зада, ба дарвозаи худ як гол сар доданд. Дар нимаи дуюми дидор мизбонон се голи беҷавоб ба самар расонданд.

Ба ин тартиб, пас аз натиҷагирии бозиҳои се даври мусобиқот дар гурӯҳи “С” Ҷопон ва Тоҷикистон дар мақомҳои якуму дуюм ба қисми ниҳоии Ҷоми Осиё-2026 роҳ ёфтанд.

Яҳё МАҲМАДНАБИЕВ, “ҶТ”