Футболбозони бомаҳорати тими миллии Тоҷикистон Ваҳдат Ҳанонов ва Парвиз Умарбоев дар ҳайати бошгоҳҳои хеш мавсимро бо ғолибият хатм намуданд, ки яке қаҳрамони Эрон гардиду дигаре ба Лигаи конфронс роҳ ёфт.

2-юми июн дар даври ниҳоии чемпионати Эрон дастаи “Персеполис” дар майдони худ бар “Мес Нафсанҷон” пирӯз шуд (1:0) ва ҳимоятгари тими мазкур Ваҳдат Ханонов бори дуюм бо дастаи хеш пайдарпай қаҳрамони Эрон шуд.

Дар даври охири Чемпионати Булғористон бошад, тими “ЦСКА 1948”, ки дар он футболбози тоҷик Парвиз Умарбоев ҳунарнамоӣ мекунад, барои дарёфти роҳхат ба мусобиқаи Лигаи конфронс (УЭФА) бо дастаи “ЦСКА”-и София рақобат кард.

Ҳарчанд худи Умарбоев дар ин вохӯрӣ бар асари зиёд доштани корти зард иштирок накарда бошад ҳам, дастааш бо ҳисоби 2:0 дастболо шуда, ба мусобиқаи Лигаи конфронс, ки аз лиҳози аҳамият сеюмин мусобиқаи байни дастаҳои Аврупо ба шумор меравад, роҳхат гирифт.