21 июн дар шаҳри Душанбе бахшида ба Рӯзи байналмилалии йога чорабинии варзишию солимгардонӣ баргузор шуд.

Чорабинӣ дар боғи “Наврӯзгоҳ” бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Сафорати Ҷумҳурии Ҳиндустон дар Тоҷикистон, Кумитаи миллии олимпии Тоҷикистон ва Мақомоти иҷроияи ҳокимияти давлатии шаҳри Душанбе роҳандозӣ гардид.

Ба иттилои масъулин, дар ин ҳамоиш намояндагони вазорату идораҳо, варзишгарон, ҷавонон ва ҳаводорони йога иштирок намуда, машқҳои дастаҷамъонаи йогаро иҷро карданд.

Созмондиҳандагон мегӯянд, ҳадафи асосии чорабинӣ тарғиби тарзи ҳаёти солим, таҳкими саломатии аҳолӣ ва баланд бардоштани маърифати ҷомеа дар бораи нақши машқҳои йога дар беҳдошти саломатии ҷисмонӣ ва равонӣ мебошад.

Дар ҷараёни ҳамоиш таъкид шуд, ки йога имрӯз на танҳо як намуди машқи ҷисмонӣ, балки василаи муассири коҳиши фишорҳои равонӣ, беҳтар намудани тавозуни руҳӣ ва баланд бардоштани сифати зиндагӣ ба шумор меравад.

Гуфтан ба маврид аст, ки Рӯзи байналмилалии йога ҳамасола 21 июн дар саросари ҷаҳон таҷлил мешавад. Ин рӯз соли 2014, пас аз пешниҳоди Сарвазири Ҳиндустон Нарендра Моди дар иҷлосияи 69-уми Маҷмааи умумии Созмони Милали Муттаҳид таъсис ёфт. Ташаббуси мазкур аз ҷониби 177 кишвари ҷаҳон ҷонибдорӣ ёфта, бо ризоияти умум қабул гардид.

Имрӯз йога дар бисёре аз кишварҳои ҷаҳон ҳамчун як усули муассири нигоҳдории саломатӣ, рафъи стресс ва беҳсозии ҳолати равонӣ васеъ истифода мешавад.

Яҳё МАҲМАДНАБИЕВ, “ҶТ”