Имрӯз, 22 феврал дар Варзишгоҳи марказӣ бозии ниманиҳоии Ҷоми ФФТ -2017 миёни дастаҳои “Регар-ТадАЗ”-и Турсунзода ва “Куктош”-и ноҳияи Рӯдакӣ баргузор гардид.

Дар ин дидор тими “Регар-ТадАЗ” бар ҳарифи худ бо ҳисоби 2-1 ғалаба намуд.

Алишер Ҳақбердиев, сармураббии дастаи “Регар- ТадАЗ” қувваи ҳарифро барорар дониста иброз дошт : “Дар ин бозӣ мо пеш аз ҳама ғалабаро интизор будем, ва дастаи рақиб новобаста аз он, ки дар лигаи якум бозӣ мекунад рақобати хуб нишон дод. Мо кӯшиш менамоем, ки дар финал бо чемпиони кишвар бозии хуб нишон диҳем".

Дар қисми аввали бозӣ Дилшод Бозоров бозингари дастаи “Регар-ТадАЗ” бо гирифтани корти сурх майдонро тарк намуд ва то охири рақобат регариҳо 10 нафар бозӣ намуданд.

Евгений Хотимский легионери тими “Регар-ТадАЗ” таъкид намуд, ки дастаи “Куктош” дар рафти бозӣ бисёр фишор овард, аммо ноком гардид. Мо барои медали тиллои Ҷоми ФФТ-2017 мубориза мебарем”.  

Аз сабабе, ки дастаи “Равшан”-и Кӯлоб ба бозии дуюми ниманиҳоӣ  ташриф наовард, тими “Истиқлол”-и Душанбе се холро соҳиб шуд ва ба финалӣ Ҷоми ФФТ роҳхат гирифт.

Бозии финалии Ҷоми ФФТ-2017  24 феврал соати 17:00 дар Варзишгоҳи марказӣ  баргузор мегардад.