3 июн дар бинои Муассисаи давлатии фарҳангию фароғатии “Аҳорун”-и пойтахт Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Мақомоти иҷроияи ҳокимияти давлатии шаҳри Душанбе ҷиҳати ҷамъбасти моҳвораи ҷавонон, бо суруру шодкомӣ қадршиносӣ намудани ғолибони мусобиқаву озмунҳо ва бо пайки шодмонӣ ҳусни интиҳо бахшидан ба моҳвораи мазкур дар соли 2025 барномаи фарҳангии идонаро таҳти унвони “Тоҷикистон – кишвари орзуҳои ҷавонӣ” доир намуданд.

Дар ин бора аз маркази таҳлил ва иттилооти Кумитаи кор бо ҷавонон ва варзиш хабар доданд.

Бино ба иттилои манбаъ, чорабинии фарҳангӣ бо иштироки роҳбарият, кормандон ва фаъолони Кумитаи кор бо ҷавонон ва варзиш, роҳбарият ва ҳайати сохтории Мақомоти иҷроияи ҳокимияти давлатии шаҳри Душанбе, ҷоизадорону ғолибони озмунҳои ҷумҳуриявию байналмилалӣ, варзишгарон, гирандагони стипендияҳои президентӣ, гурӯҳи ҳаваскорон ва намояндагони васоити ахбори омма баргузор гардид.

Пеш аз оғози чорабинӣ ҳайати иштирокчиёни маросими фарҳангӣ аз растаҳои намоишии дастовардҳои соҳаи кор бо ҷавонон ва варзиши пойтахт дидан намуданд.

Нахуст, Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо сухани ифтитоҳӣ баромад намуда, иброз дошт: “Барои ҷавони ватандӯсту хештаншинос, ки мехоҳад дар рушду ташаккулёбии Тоҷикистон саҳмгузор бошад, бояд ҳаррӯзи зиндагияш чун ид бошад. Зеро ҷавонӣ фасли шӯрангези зиндагӣ ва мазҳари нишоту созандагӣ аст. Баргузории силсила чорабиниҳо ҷиҳати ҳавасмандсозиву дастгирии ҷавонон дар доираи моҳвораи ҷавонӣ дар тамоми қаламрави кишвар гувоҳи равшани таваҷҷуҳи хоси давлату Ҳукумати мамлакат ба ҷавонон аст. Аз ин лиҳоз, шӯр ва оҳанги зиндагӣ дар нигоҳи равшан ва умедвори ҷавонон мутаҷаллӣ аст”.

Масъулини шаҳри Душанбе низ зимни суханронии хеш нақш ва мавқеи ҷавононро дар рушду ташаккулёбии тамоми самтҳои афзалиятноки пойтахти мамлакат бориз арзёбӣ намуданд.

Дар идома ба ғолибони озмуни ҷумҳуриявии “Донишҷӯи сол”, ки дар интиҳои моҳвораи ҷавонон натиҷагирӣ гардид, дар фазои тантанавӣ диплом, маблағҳои пулӣ ва ба чанде аз фаъолони соҳа, инчунин ба якчанд сохторҳое, ки дар татбиқи сиёсати давлати ҷавонон саҳмгузоранд, туҳфаҳои хотиравӣ тақдим гардиданд.

Тибқи иттилоъ, ҳамзамон бахшида ба моҳвораи ҷавонон аз ҷониби як қатор сохторҳо чанде аз кормандони соҳаи кор бо ҷавонон ва варзиш бо ихтихорнома, медалҳои сарисинагӣ ва ҷоизаҳои соҳавию давлатӣ сарфароз гардонида шуданд.

Баъд аз қисми расмии чорабинӣ барномаи фарҳангӣ пешкаши ҳозирин гардонида шуд.