Вақте 18 июли соли 2015 бо Фармони Президенти ҷумҳурӣ Эмомалӣ Раҳмон Шӯрои миллии кор бо ҷавонон дар назди Президенти Ҷумҳурии Тоҷикистон ташкил шуд, дар ҷомеа андешаҳои гуногун ба вуҷуд омад. Ҷавонони кишвар таъсиси онро ҳамчун як муждаи навбатии Пешвои миллат дар ҳаёти сиёсиву фарҳангӣ ва иқтисодиву маънавии ҷавонони кишвар қабул намуданд.

Аксари коршиносон низ бар ин назар буданд, ки ин иқдом ба беҳтар шудани ҳаёти ҷавонон такони ҷиддӣ бахшида, дар оянда байни Роҳбари давлат ва ҷавонон боз ҳам қаробат фароҳам меорад. Аз ҷониби масъулини Кумитаи ҷавонон, варзиш ва сайёҳӣ изҳор гардида буд, ки ин мужда кулли ҷавонони саодатманди Тоҷикистонро фараҳманд кардааст: “Мулоқотҳои пайвастаи Президенти кишвар бо намояндагони ҷавонони кишвар собит месозанд, ки Сарвари давлат ба нерӯи созанда, иқдомҳои бунёдкорона, ташаббусҳои наҷиб ва маҳорати пешвоёнаи ҷавонон боварии комил доранд ва ғамхорӣ дар ҳаққи насли ояндасози миллат як самти фаъолияташон маҳсуб меёбад. Боиси хушнудист, ки ҳар як мулоқоти Президенти кишвар, муҳтарам Эмомалӣ Раҳмон бо намояндагони ҷавонон ба манзур сохтани як падидаи ҷолиб ва ташаббуси наҷиб ба анҷом мерасад. Таъсиси Ҷоизаи ба номи Исмоили Сомонӣ барои олимони ҷавон, Ҷоизаи Кумитаи ҷавонон, варзиш ва сайёҳӣ дар соҳаи адабиёт, рӯзноманигорӣ, санъат, меъморӣ ва барномасозӣ, стипендияи Президент барои хонандагон, Квотаи Президент барои ҷавонони ноҳияҳои дурдаст, стипендияи байналмилалии “Дурахшандагон”, Грантҳои Ҳукумати кишвар дар самти тарбияи ватандӯстии ҷавонон, Ҷоизаи Президент барои варзишгарон, инчунин баргузории конфронсу форумҳо, анҷуману фестивалҳо, семинарҳои омӯзишиву мизҳои мудаввар, чорабиниҳои сиёсиву фарҳангӣ, илмиву маърифатӣ, ҳарбиву варзишӣ ва ҳоказо аз дигар иқдомҳои наҷиб ва ҳидоятҳои хирадмандонаи Роҳбари муаззами мамлакат маҳсуб меёбанд”.

Вале як гурӯҳ чун ҳамеша ташкил шудани ин шӯроро зери танқид гирифтанд ва бовар доштанд, ки он ба ном боқӣ мемонад. Аммо баргузории ҷаласаи нахустини он дар таърихи 27 майи соли ҷорӣ нишон дод, ки Шӯрои миллии кор бо ҷавонон на дар рӯйи коғаз, балки амалан аз дигар иқдому шӯрову созмонҳо ба куллӣ тафовут дорад.

Пеш аз ҳама, таъсиси Шӯрои миллии кор бо ҷавонон таҳти раёсати Пешвои миллат “ҳадафи мавриди баррасӣ қарор додани масъалаҳои вобаста ба татбиқи сиёсати давлатии ҷавонон ва дар ин замина барои ба корҳои муҳими давлативу ҷамъиятӣ бештар ҷалб кардани онҳоро дошта, муносибат бо ҷавонон, роҳандозии усулҳои боз ҳам муассири ҳамкорӣ ва ҳамоҳангсозии фаъолияти мақомоти марказӣ ва маҳаллии ҳокимияти давлатиро бо ташкилоту созмонҳои ҷавонон тақвият мебахшад”.

Агар ба сохтори дигар давлатҳои ҷаҳон назар андозем, дармеёбем, ки дар ягон кишвари олам на танҳо чунин таваҷҷуҳ ба ҷавонон нест, балки ниҳоди махсуси давлатии кор бо ҷавонон надоранд.
Вақте мо мушкилоти ҷавонон мегӯем, бояд бевосита мушкилоти ҷомеаи Тоҷикистон дар назар дошта шавад, чунки беш аз 70 фисади аҳолии кишварро ҷавонон ташкил медиҳанд ва мафҳуми ҷомеа бо ҷавонон ҳаммаъно мегардад. Агар мушкилоти ҷавонон ҳал шавад, маънои онро дорад, ки ҷомеаи мо дигар проблема надорад ва барои мо хушбахтӣ аст, ки раҳбарияти олии давлату ҳукумати кишвар ин масъаларо амиқан дарк мекарданд ва то имрӯз баҳри ҳалли проблемаҳои ҷавонон пайваста талош мекунанд. Зери роҳбарии Пешвои миллат амал намудани Шӯрои миллии кор бо ҷавонон намунаи олии эътимоду боварӣ ва эҳтироми роҳбарияти сатҳи олии мамлакат нисбат ба ҷавонони саодатманди кишвар буда, ин тадбир имкон медиҳад, ки пешниҳодоти онҳо ҳарчи бештар дастгирӣ ёбад ва мушкилоти дар ин самт мавҷуда сари вақт баррасию роҳу усулҳои фаъолияти минбаъдаи ҷавонон боз ҳам дақиқу мушаххас карда шаванд”.

Ҷанбаи аз ҳама муҳим мактаби омодакунии кадрҳои хизмати давлатӣ аст. Чунки дар баробари баррасии мушкилоти ҷавонон шунидани саргузашти Пешвои миллат, ки дар марҳилаҳои гуногуни роҳбариашон ба он рӯ ба рӯ шуда, бе эҳсоси хастагиву даст кашидан аз масъулияти сангин тамоми мушкилотро паси сар кардаанд, барои ҷавонон як мактаби бузурги омодагӣ барои хизмати давлатӣ маҳсуб мешавад.

Ба андешаи профессор Назрӣ Офаридаев, Эмомалӣ Раҳмон на танҳо Пешвои миллат, инчунин шахсияти байналмилалӣ аст. Ӯ дар давоми фаъолияти роҳбариаш тамоми имтиҳони давлатдориро гузашт ва ҳамчун як сиёсатмадори барҷастаи сатҳи ҷаҳонӣ таҷрибаи зиёд андухт. Барои ҷавонон омӯхтани аққалан як ҷузъе аз таҷрибаҳои Пешвои миллат бас аст, ки онҳо ҳамчун шахсиятҳои баркамоли миллат тарбия ёбанд.

Бовар дорем, ки ҳар як ҷавони тоҷик аз дарсҳои Пешвои миллат баҳраманд шуданро мехоҳад.