Дар доираи баргузории V - умин Анҷумани маҳфили "Ҷавонони дар хориҷи кишвар таҳсилдошта"  иштирокчиёни анҷуман аз мавзеи таърихии Саразми шаҳри Панҷакент дидан намуданд. 

Мавзеи  таърихии Саразм 20 км дуртар  аз маркази шаҳр ҷойгир буда, таърихи беш аз 5500 сола дорад. Ин мавзеъ бозгӯи волои фарҳанги шаҳрнишинии  миллати тоҷик буда,  он баёнгари дорои фарҳанги воло ва таърихи куҳани шаҳрсозиё тамаддунгароӣ будани миллати тоҷик мебошад. 

Ҷавонони тоҷик аз мавзеи таърихии мазкур дидан намуда, бо ифтихори баланди ватандорӣ, аз миллату таърих ва давлати хеш ифтихор намуданд. 

Хусрав Аюбов, роҳбари намояндагии маҳфил дар Федератсияи Россия зимни боздид аз ин мавзеи таърихӣ иброз дошт: “миллати тоҷик бо услубу эҷоди тамаддунофарӣ ва созандагиву бунёдкорӣ дар олам машҳур гардида, оламиён эътироф менамоянд, ки тоҷикон миллати таърихӣ ва созандаанд. Мо ҷавонони миллати тоҷдор талош менамоем, ки аз созандагиву бунёдкории  миллати тоҷик пайравӣ намуда, Тоҷикистони соҳибистиқлолро ба ҷаҳониён муаррифӣ намоем”. 

Мавриди зикр аст, ки дар доираи дастуру ҳидоятҳои Пешвои муаззами миллат, муҳтарам Эмомалӣ Раҳмон мавзеи мазкур тармиму  таҷдид гардидаистода, барои тадқиқотҳои археологӣ имконият фароҳам оварда шудааст.