Ҷавонон неруи созанда ва такягоҳи ҷомеаанд. Фаъолияти онҳо дар маҳал то саҳмашон дар таҳкими Истиқлоли давлатӣ, масъулияти насли нав дар пешрафти кишвар рӯз то рӯз бештар эҳсос мешавад.
Бо яке аз ҷавонони фаъол, мудири бахши кор бо ҷавонон ва варзиши ноҳияи Данғара, Фаридун Раҳимзода суҳбат намудем.

- Дар доираи нақша чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон, ноҳияи Данғара 34-умин солгарди Истиқлоли давлатиро чӣ гуна пешвоз гирифт?

- Бахши кор бо ҷавонон ва варзиши ноҳияи Данғара дар доираи нақша чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба 34-умин солгарди Истиқлолияти давлатӣ як қатор корҳоро ба сомон расонидааст. Тибқи нақшаи назоратӣ дар қисми низомии 13483-и ноҳия вохӯрию мулоқот ва аёдати онҳо дар мавзӯи “Истиқлолият - рамзи саодати миллат” гузаронида шуд.

Дар Ҷамоати шаҳрак, деҳаи Розиён, деҳаи Тоҷмаҳал, деҳаи Баҳор, маҳаллаи 4 ва совхоз флешмоби насби парчамҳо дар хонаҳои истиқоматӣ ва ҷашн гирифтани Истиқлолияти давлатӣ дар иҳотаи оилаҳои ноҳия гузаронида шуд.
Инчунин, дар деҳаҳои гуногуни ноҳия флешмоби озмуни видеоӣ таҳти унвонҳои “Деҳаи ман дар замони Истиқлол”, “Ободии деҳаи ман дар партави Истиқлол”, “Нумӯи истиқлол дар деҳаи ман” ва “Истиқлол дар симои деҳаи ман” дар сомонаи фейсбукӣ нашр шуд.

Ҳамзамон, оид бо ҳамоиши тантанавии ҷавонону варзишгарон таҳти унвони “Ҷавонон таҳкимбахши дастовардҳои даврони соҳибистиқлолӣ ва пайравони Пешвои миллат” дар назди Парчами давлатии ноҳия роҳпаймоӣ ва дар Варзишгоҳи марказии ноҳия чорабинии фарҳангӣ -фароғатӣ баргузор гардид.

- Шумо саҳми насли ҷавонро дар таҳкими Истиқлоли давлатӣ чӣ гуна арзёбӣ мекунед?

- Саҳми насли ҷавонро дар таҳкими истиқлолият дар сатҳи баланд мебинам. Саҳми ҷавонон дар таҳкими истиқлол дар ноҳияи Данғара дар аксари инфрасохторҳои давлатӣ хеле зиёд мебошад. Аз ҷумла, дар вазифаҳои гуногун 13 нафар ҳамчун хизматчии давлатӣ фаъолият намуда истодаанд. Ҷавонон дар тамоми соҳаҳои иқтисодию иҷтимоӣ кор ва фаъолият намуда, саҳми худро дар татбиқи сиёсати давлатӣ гузошта истодаанд.

- Ба андешаи шумо, барои ҷавонони ноҳия ва умуман ҷавонон дар 34 соли истиқлол чӣ гуна имкониятҳо барои рушди онҳо фароҳам оварда шуданд, ки қаблан набуданд?

- Ба андешаи мо барои ҷавонон дар 34 соли истиқлол дар ноҳия бисёр имкониятҳо барои рушд намудани онҳо фароҳам оварда шуданд. Аз ҷумла, Донишгоҳи давлатии Данғара, Донишгоҳи давлатии тиббии Хатлон, коллеҷҳо ва марказҳои омӯзишӣ барои баланд бардоштани рушди зеҳнии онҳо фароҳам оварда шудаанд.

- Ҷавонони тоҷик имрӯз бештар ба кадом соҳаҳо майл доранд - илму технология, соҳибкорӣ ё варзиш?

- Ҷавонони тоҷик имрӯз дар бисёре аз соҳаҳои кишвар, аз ҷумла технология, варзиш, соҳибкорӣ ва дигарҳо майл доранд.
Дар шароити ҷаҳони муосир, ки пур аз таҳдидҳост, неруи зеҳнӣ, ҷисмонӣ ва ахлоқии ҷавонон барои ҳар як давлат захираи бебаҳо маҳсуб меёбад. Ҷавонон бояд дар сафи пеши маърифат, илм, технология ва созандагӣ бошанд. Имрӯз давлату Ҳукумати Тоҷикистон шароити мусоидро барои озодона таҳсил ва таълиму тарбияи насли ҷавон муҳайё сохтааст: садҳо донишгоҳу муассисаҳои таҳсилоти олӣ, барномаҳои давлатии дастгирии ҷавонон, стипендияҳо, барномаҳои табодули донишҷӯён ва дигар имкониятҳои равнақдиҳандаи илм, варзиш ва ташаббусҳои соҳибкорӣ.

Ҷавонон дар татбиқи ташаббусҳои созандаи Пешвои миллат, бахусус дар самти созандагиву бунёдкорӣ, тарғиби ташаккули тарзи ҳаёти солим, арҷгузорӣ ба арзишҳои миллӣ ва таҳкими ваҳдати миллӣ бояд фаъолона иштирок намоянд.

- Кадом корҳо айни замон дар доираи нақша чорабиниҳои Кумитаи кор бо ҷавонон ва варзиши кишвар дар ноҳия ба нақша гирифта ва ё анҷом шуда истодаанд?

- Дар доираи нақша чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон як қатор корҳо ба нақша гирифта шудааст. Аз ҷумла, бахшида ба “Рӯзи забони давлатӣ” ва “Конститутсияи Ҷумҳурии Тоҷикистон” чорабиниҳои муҳим ба нақша гирифта шудааст. Айни замон озмуни “Мақолаи беҳтарин” дар мавзӯи “Забони давлатӣ” гузашта истодааст.

- Нақши варзишгарони ҷавон дар муаррифии Тоҷикистон дар арсаи байналмилалӣ зиёд аст. Дар ноҳияи Данғара ин раванд чӣ гуна аст ва чӣ барномаҳо барои рушди минбаъдаи онҳо тарҳрезӣ шудаанд?

- Дар ноҳияи Данғара вобаста ба рушди варзишгарон “Барномаи маҷмуи рушди тарбияи ҷисмонӣ ва варзиш барои солҳои 2022-2026” амал мекунад, ки варзишгарон дар мусобиқаҳои сатҳи байналмилалӣ, ҷумҳуриявӣ, вилоятӣ ва ноҳиявӣ иштирок намуда, дар давоми соли 2025 сазовори 98 медали тилло, 99 медали нуқра ва 158 медали биринҷӣ гаштанд.

Дар ноҳия як мактаби варзишӣ ва як маҷмааи варзишӣ, 116 майдончаи варзишӣ, 31 толори варзишӣ, 1 майдони варзишии дорои 10 000 ҷойи нишаст ва 2 майдони варзишии дорои 2500 ҷойи нишаст, 5 майдони футболи хурди сунъӣ амал мекунад.

- Технология ва шабакаҳои иҷтимоӣ ба ҳаёти ҷавонон таъсири бузург доранд. Бахши кор бо ҷавонон дар ноҳия чӣ гуна нақша дорад, то ҷавонон аз онҳо бештар ба манфиат истифода баранд?

- Шабакаҳои иҷтимоӣ яке аз платформаҳои васеи иттилоотӣ ба ҳисоб меравад, ки имрӯзҳо онро метавон як қисми ҷудонашавандаи ҳаёт ва фаъолияти ҳар шахси истифодабаранда номид. Аз ин рӯ, барои ҷомеа ва махсусан ҷавонон низ интернет аҳамияти калон дорад.

- Имрӯз ҷавони тоҷик бояд барои таҳкими Истиқлоли давлатӣ чӣ корҳоро ба сомон расонад?

- Ҷавонони тоҷик бояд дар таҳкими пояи давлатдорӣ пеш аз ҳама аз таъриху фарҳанг ва донишу малака бархӯрдор бошанд. Чунки дар ҷаҳони муосир ҳамавақт илму дониш, заковат, ақлу хирад дар ҷойи аввал меистад. Ҳамин буд, ки Пешвои миллат барои бархӯрдор гаштан аз таъриху фарҳанг ва дониш китоби “Тоҷикон”-ро ба ҳар як оилаи тоҷику тоҷикистонӣ тақдим намуданд, ки барои мукаммал гардонидани донишу фаҳмишҳои сиёсӣ саҳми назаррас гузошт.

Пешвои миллат дастур доданд, ки ба ҳар як оилаи тоҷикистонӣ китоби безаволи “Шоҳнома”-и Абулқосим Фирдавсиро тақдим намоянд, ки иқдоми беназир аст.

- Шумо шахсан аз ҷавонони кишвар чӣ интизорӣ доред ва паёми шумо ба ҷавонони имрӯза чист?

- Аз ҷавонони кишвар даъват ба амал меорам, ки барои пойдории Истиқлоли давлатии Ҷумҳурии Тоҷикистон ва ваҳдати миллӣ ҳамеша омода бошанд ва саҳми худро дар пешрафти кишвар гузоранд.

Суҳбати Фарзонаи УМАРАЛӢ, “ҶТ”