Дар Маркази омодагии олимпии Хоруғ ба муносибати Рӯзи Президенти Ҷумҳурии Тоҷикистон ва ифтитоҳи агрегати якуми НБО – и “Роғун” чорабинии идона баргузор гашт.

Дар он муовини якуми Кумитаи кор бо ҷавонон ва варзиши назди Ҳукумати мамлакат Ризо Назарзода, раиси шаҳри Хоруғ Кишвар Шамиров, муовинони раиси ВМКБ ва сокинони шаҳру навоҳии вилоят ширкат намуданд.

Нахуст, ҳозирин аз намоиши молу маҳсулот ва ҳунарҳои косибию дастии мардуми вилоят дидан карда, баҳри дар сатҳи баланд ташкил намудани он ба бошандагони шаҳру ноҳияҳо изҳори сипос гуфтанд.

Зимни баромади хеш масъулин иброз доштанд, ки Пешвои миллат муҳтарам Эмомалӣ Раҳмон замоне ба сари қудрат омад, ки Тоҷикистон ба ҷанги таҳмилии дохилӣ гирифтор буд ва кишварро хавфи нобудӣ таҳдид мекард. Мардум ба парокандагиву гуруснагиву нодорӣ ва ҷангу ҷидол рӯ ба рӯ буд. Дар ин вазъи нобасомон табиист, ки рисолати асосии Пешво – ба созиш овардан ва муттаҳид сохтани гурӯҳҳои мухталифи ҷомеа дар асоси идеяҳои нав, арзишҳо ва идеалҳои миллӣ мебошад. Яке аз хислатҳои наҷиби Президенти кишвар ин назари нек ва ватанхоҳонаи ӯ ба ҳамаи минтақаҳои мамлакат баҳри рушду нумӯи онҳо мебошад. Воқеияти замони истиқлолият ба хубӣ исбот намуд, ки ин фарзанди наҷибу некиродаи халқи тоҷик ҳамчун шахсияти таърихӣ рисолати хешро дар ҷомеасозӣ ва давлатсозии миллӣ сарбаландона иҷро намуд.

Дар интиҳои чорабинӣ барномаи фарҳангӣ бо иштироки ҳунармандони шаҳри Хоруғ ва ноҳияҳои вилоят пешкаши иштирокчиён гардонида шуд.