Имсол ҳам маъракаи даъвати тирамоҳии сафарбаркунии ҷавонон ба хизмати ҳарбӣ дар ноҳияи дурдасти Носири Хусрав дар рӯзи аввали даъват барзиёд иҷро гардид.

Аз рӯзи аввали маъракаи даъвати ҷавонон ба хизмати ҳарбӣ ҷавонони синни даъватии ноҳияи Носири Хусрав бо мақсади шомил гардидан, ба сафи Қувваҳои Мусаллаҳи кишвар ба комиссариати ҳарбии ноҳия ҳозир шуданд.

Тавре дар маросими тантанавии гусели даъватшавандагон ба хизмати ҳарбӣ зикр гардид, чун анъана ҳамасола теъдоди кифояи ҷавонони ватандӯсти ин ноҳияи сарҳадӣ ихтиёран ба хизмати Модар-Ватан мераванд. Роҳбарияти ноҳияи Носири Хусрав дар чорабинии тантанавӣ бахшида ба сафарбаркунии ҷавонон ба хизмати ҳарбӣ аз фаъолнокии даъватшавандагон барои омодагӣ ба хизмати Ватан изҳори миннатдорӣ намуда, саҳми падару модарон, муассисаҳои таълимӣ, инчунин бахшҳои кор бо ҷавонон ва дигар масъулони марбутаро дар тарбияи ҷавонон дар рӯҳияи ватандӯстӣ ва эҳсоси баланди масъулиятшиносӣ дар ҳифзи марзу буми кишвар муҳим арзёбӣ намуданд.

Маросими даъвати ҷавонон ба сафи Қувваҳои Мусаллаҳи Тоҷикистон дар ноҳияи дурдасти Носири Хусрав бо барномаи фарҳангии санъаткорони ноҳия ва дуои волидони даъватшавандаҳо ба охир расид.