Имрӯз дар шаҳри Душанбе ҷиҳати тақвият додани ҳамкориҳои Тоҷикистон ва Олмон дар самти кор бо ҷавонон ва варзиш мулоқоти Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо Йорк Шуграф, сафири фавқулода ва мухтори Ҷумҳурии Федеративии Германия дар Ҷумҳурии Тоҷикистон баргузор гардид.

Тибқи иттилои маркази таҳлил ва иттилооти Кумитаи кор бо ҷавонон ва варзиш, зимни суҳбат ҷонибҳо оид ба ҳамкориҳои минбаъдаи ду кишвар дар соҳаи кор бо ҷавонон ва варзиш табодули афкор карда, доир ба як зумра масъалаҳо, аз қабили тақвияти ҳамкорӣ дар самти татбиқи ҳамгироии сиёсати давлатии ҷавонон, татбиқи лоиҳаҳои муштарак дар самти рушди инфрасохтор барои ҷавонон, рушд ва инкишофи тарбияи ҷисмонӣ ва варзиш, ташкили чорабиниҳои дуҷониба, баргузории форумҳои ҷавонон бо мақсади табодули таҷрибаи ҷавонони ҳарду кишвар муколама намуданд.

“ҶТ”