22 октябр дар шаҳри Манамаи Подшоҳии Баҳрайн дар ҳошияи Бозиҳои олимпии ҷавонони Осиё мулоқоти раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Гулаҳмадзода Зулфиқор Аҳмад бо вазири корҳои ҷавонони Подшоҳии Баҳрайн хонум Равон бинти Наҷиб Тавфиқӣ баргузор гардид.

Бино ба иттилои маркази таҳлил ва иттилооти Кумита, дар мулоқот инчунин сафири Фавқулода ва Мухтори Ҷумҳурии Тоҷикистон дар Подшоҳии Баҳрайн Акрам Каримӣ ва намояндагони мақомоти марбутаи ҳар ду кишвар иштирок намуданд.

Зимни вохӯрӣ ҷонибҳо масъалаҳои рушди ҳамкориҳои дуҷониба дар соҳаи ҷавонон ва варзишро мавриди баррасӣ қарор дода, ба зарурати густариши муносибатҳои мутақобилан судманд миёни Тоҷикистону Баҳрайн таъкид намуданд. Раиси Кумита бо изҳори қаноатмандӣ аз сатҳи муносибатҳои дӯстона миёни ду кишвар таъкид намуд, ки Тоҷикистон омодааст ҳамкориҳоро дар самтҳои кор бо ҷавонон ва варзиш ба роҳ монад.

Таъкид гардид, ки Ҳукумати Ҷумҳурии Тоҷикистон таҳти роҳбарии Пешвои миллат муҳтарам Эмомалӣ Раҳмон ба рушди ҷавонон ва варзиш аҳамияти хосса медиҳад. Солҳои охир дар кишвар марказҳои ҷавонон, толор ва маҷмааҳои варзишии замонавӣ, ҳамчунин технопаркҳои инноватсионӣ ва барномаҳои таълимии ҷавонон таъсис ёфта, амал мекунанд.

Ҷонибҳо омодагии худро барои таҳияи лоиҳаҳои муштарак дар самти рушди инфрасохтор, мубодилаи таҷриба ва ташкили чорабиниҳои муштараки байналмилалӣ изҳор доштанд.

Дар анҷоми вохӯрӣ Гулаҳмадзода Зулфиқор, раиси Кумитаи кор бо ҷавонон ва варзиши назди Ҳукумати кишвар аз меҳмоннавозии гарми ҷониби Баҳрайн изҳори сипос намуда, баргузории мулоқотро оғози марҳалаи нави ҳамкории ду кишвар дар соҳаи ҷавонон ва варзиш арзёбӣ намуд.

“ҶТ”