Салом модари азиз!

Имрӯз рӯзи милоди туст. Бовар дорам, ки ин шом ҳама аҳли оила гирди хони зодрӯзӣ ҷамъ шуда, бо таманниёти рангин милоди туро ҷашн мегиранд. Чӣ фараҳзост, ки вақте тамоми оила ҷамъ мешаванду милоди азизтарин нафари хонадон - МОДАРро истиқбол мегиранд. Милоди нафаре, ки ҳастиашро баҳри якояки хонавода бахшидааст.

Ва хеле бароям вазнин аст, ки ин шом наметавонам гирди он суфра ҳозир шаваму баҳрат таманное кунам ва ба ҳар муборакбодие кафкубӣ намоям. Мутмаинам, ки маро дарк мекунӣ.

Модари азиз! Писари ба ҷон баробарат имрӯз сарбоз аст ва аз як гушаи дури Ватан бароят мактуб менависад. Мактубе, ки дар ҳар ҳарфаш самимияту садоқат, вафодориву мардонагӣ ва ифтихору ғурур дарҷ гардидааст. Ман имрӯзҳо дарк мекунам, ки дурӣ аз ту чӣ қадар душвор асту чӣ қадар сабр мебояд, то онро таҳаммул кард. Вале ҳамеша як ибора маро таскин медиҳад “Ман модарамро ҳимоя мекум! Ва дар ин дуриҳо мефаҳмам, ки лаҳзаҳои кӯдакиву бо ту буданам чӣ қадар гуворову рангин буд. Ва мутаассифам, ки ҳанӯз натавонистам заррае аз ранҷҳое, ки аз барои ман кашидаӣ ҷуброн кунам. Аз ту бобати тамоми азиятҳои бачагӣ маъзарат мехоҳам, модар.

Модари азиз! Имрӯзҳо ҷигарбанди ту баҳри дифои ватан сари сангар қарор дорад. Шабу рӯз дар дидбонгоҳ истодаву барои ҳар ваҷаб хоки Ватани азиз омодааст, ҷонашро нисор кунад. Ва ту бояд ифтихор кунӣ, ки Модар-Ватан ба ҷигаргӯшаи ту бовар кардаву ин масъулияти гаронро ба дӯши ӯ мегузорад. То парчами сулҳу истиқлол ба таври ҳамешагӣ парафшонӣ кунад. То абад дӯстдорат ҳастам, модар! Зодрӯзат муборак!

Садсола шавӣ Илоҳо,

эй модари ҷон,

Ҷоят ба дилу дидаву

номат ба забон.

Ҳарчанд падар азизу

ҳам мӯътабар аст,

Саҳми ту зи саҳми

ӯст даҳчанд калон.

Бо самимияти зиёд, писарат

Меҳроб ЗИЁЕВ, сарбози қисми ҳарбии 07017-и Вазорати
мудофиаи Ҷумҳурии Тоҷикистон