Имрӯз дар дараи Ромити шаҳри Ваҳдат маросими кушодашавии “Лагери ҷумҳуриявии омӯзишӣ, интерактивӣ – назариявӣ оид ба муҳоҷирати бехатар ва мубориза ба савдои одамон” бо иштироки намояндаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон, директори КВД "Маркази ташаккули фарҳанг ва рушди иҷтимоии ҷавонон" Муродзода Муҳсин, роҳбари Созмони байналмилалии муҳоҷират - оҷонсии СММ оид ба муҳоҷират дар Тоҷикистон Виктор Лутенко, менеҷери лоиҳаи “Тоҷикистон: Муҳоҷирати бехатар ва муқовимат ба савдои одамон” Файзуллоева Моҳира ва менеҷери лоиҳаи идоракунии муҳоҷират ва дастгирии авғонҳои кучонидашуда Шаҳло Раҳимова баргузор гардид.

Дар ин бора маркази таҳлил ва иттилооти Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар додааст.

Бино ба хабар, ҳайати 50 нафараи иштирокчиёни Лагери омӯзишӣ аз санаи 12 – уми август то 16-уми августи соли ҷорӣ дар Осоишгоҳи КВД “Роҳи оҳани Тоҷикистон”, дар мавзеи зебоманзари дараи Ромити шаҳри Ваҳдат ба истироҳату омӯзиш фаро гирифта мешаванд, ки 55 фисади иштирокчиёнро ҷавонони фаъоли шаҳру ноҳияҳои Ҷумҳурии Тоҷикистон ва боқи 45 фисади дигарро ҷавонони паноҳандаи Ҷумҳурии исломии Афғонистон дар Ҷумҳурии Тоҷикистон ташкил медиҳанд.

Лагери омӯзишӣ дар доираи нақша – чорабиниҳои Кумитаи кор бо ҷавонон ва варзиш бахшида ба Рӯзи байналмилалии ҷавонон роҳандозӣ гардида, барномаи чорабинӣ дар рушди шуур, малакаи зеҳнӣ, иродаи сиёсӣ, ташаккули фарҳанги дӯстӣ ва афкори шаҳрвандии ҷавонон нақши бориз мегузорад.