Шоҳкамон аз замони таҳсил дар мактаби миёна пайваста таваҷҷуҳаш ба илмҳои дақиқ зиёд буду ба устодон доир ба паҳлӯҳои гуногуни фанҳои мазкур суол медоду посух мегирифт. Ҳар гуна ашё диққати ӯро ба худ ҷалб мекарду бисёр мехост, доир ба чӣ гуна сохта шудани он маълумот ба даст биёрад. Ҳамин гуна кунҷковӣ ва талошҳои доимӣ билохира ӯро барои чизе сохтан таҳрик дод.

Шоҳкамон Қодиров дар шаҳри Ваҳдат таваллуд ёфта, соли 2008 пас аз хатми мактаби миёна ба факултети биологияи Донишгоҳи миллии Тоҷикистон дохил шудааст. Соли 2013 ин боргоҳи илмро хатм намуда, айни ҳол аспиранти шуъбаи рӯзонаи кафедраи биохимияи факултети биологияи ДМТ мебошад.

“Дар баробари таҳсил пеши худ мақсад гузошта будам, ки дар соҳаи худ навоварие карда бошам. Ҳамин гуна кӯшишҳоям буд, ки дар натиҷа се маводи доругиро ихтироъ намудам ва онҳо аз тарафи Маркази миллии патенту иттилоот пазируфта шуда, ихтироотам дорои патент гардид”, - мегӯяд Шоҳкамон Қодиров.

Яке аз маводҳои доругии омоданамудааш “Фитасуман” мебошад. Он нӯшобаи ҳаловатбахш буда, дар асоси 22 намуд гиёҳҳои шифобахши ватании аз ҷиҳати экологӣ тоза истеҳсол шудааст. “Фитасуман” барои бемориҳои дарунравӣ тавсия карда мешавад. Ба ғайр аз қобилияти зидди микробиаш ҳолати меъдаю рударо хуб сохта, асабро ором мекунад ва ба инсон ҳисси сиҳатмандӣ мебахшад. “Фитасуман” барои одамони калонсол дар як рӯз 2 қошуқчагӣ 3 бор ва барои кӯдакони аз 3 то 8-сола дар як рӯз як қошуқчагӣ 3 бор тавсия карда мешавад.

Маводи доругии дигари ӯ “Урсослит” мебошад. Он ҳамчун маводи доругӣ барои кам кардани миқдори холестерин дар хун ва барои ҳал кардани сангҳои талхадон истифода мешавад. “Урсослит” дар асоси баъзе стероидҳо синтез карда шудааст ва аз ҷиҳати экологӣ тоза ва безарар мебошад. Он қобилияти баланди гипохолестеринемикӣ, гиполипидемикӣ, литолитикӣ ва гепатопротекторӣ дошта, дар организм миқдори туршобаҳои холати ва фосфалипидҳоро зиёд гардонида, сатҳи ғализии хун ва заҳраи талхадонро паст мегардонад. “Урсослит” қобилияти баланди табобатӣ дошта, барои бемориҳои ҷигар ва санги талхадон тавсия карда мешавад.

Ӯ аз дастовардҳои худ хушнуд буда, дар оянда боз ҳам мехоҳад, ки дар соҳааш ба навовариҳои бештар ноил шуда, саҳми худро дар рушди тибби мамлакат гузорад. Дар ин роҳ барояш барор хоҳонем.

Беҳрӯз ХОЛМУРОДОВ, “ҶТ”