Бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон аз 16 то 20 июни соли ҷорӣ Фестивали дӯстии ҷавонон баргузор мегардад.

Дар ин бора аз маркази таҳлил ва иттилооти Кумитаи кор бо ҷавонон ва варзиш хабар доданд.

Тибқи иттилоъ, фестивали мазкур дар шаҳру ноҳияҳои Норак, Данғара, Кӯлоб, Муъминобод ва Темурмалики вилояти Хатлон гузаронида шуда, дар он 120 ҷавони фаъол аз тамоми минтақаҳои кишвар гирди ҳам меоянд, то дӯстиву якдилиро таҷассум бахшанд.

Ба таъкиди масъулин дар доири фестивал барномаҳои фарҳангӣ, озмунҳои рассомию ҳунарҳои мардумӣ, семинару мастер-классҳо, викторинаҳои шавқовар, мусобиқаҳои футбол, волейбол, шоҳмот ва озмуни “беҳтарин селфи” гузаронида мешаванд ва беҳтаринҳо бо туҳфаҳои арзанда қадрдонӣ хоҳанд шуд.