Дар асоси нақшаи чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо мақсади таҳкиму тақвияти дӯстии ҷавонон, шиносоӣ ва огаҳӣ аз анъанаву суннатҳои халқӣ, тамошои минтақаҳои таърихиву фарҳангӣ ва сайёҳӣ давоми чанд сол аст, ки дар шаҳру ноҳияҳои кишвар бо ҷалби ҷавонони фаъол Фестивали дӯстии ҷавонон баргузор мешавад.

Субҳи 1-уми май ҷавонони ноҳияи Рӯдакӣ меҳмонон - ҷавонони фаъоли кишварро дар доираи Фестивали дӯстии ҷавонон таҳти унвони “Дӯст ояд, гарм дар оғӯш гир” самимона истиқбол гирифтанд.

Дар расми ифтитоҳи фестивал, ки субҳи барвақт дар даромадгоҳи шаҳраки Сомониён сурат гирифт, Сураҷ Чоршанбезода, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Муҳаммадшариф Бобошоҳзода, муовини раиси ноҳияи Рӯдакӣ, роҳбари дастгоҳи раиси ноҳия, роҳбарони сохторҳои ноҳиявӣ ва ҷавонони фаъоли ноҳия ширкат варзиданд.

Пас аз истиқболи самимӣ ва ворид шудан ба ноҳия меҳмонони Фестивали дӯстии ҷавонони ҷумҳурӣ чун анъанаи нек дар назди муҷассамаи сардафтари адабиёти классики тоҷику форс устод Абуабдуллоҳ Рӯдакӣ гулчанбар гузоштанд.

Ҳамчунин, дар давоми рӯзи аввали фестивал меҳмонон аз гӯшаи ихтироъкорони ноҳияи Рӯдакӣ дидан намуданд.

Шомгоҳӣ дар боғи фарҳангӣ-фароғатии ноҳияи Рӯдакӣ таҳти унвони “Шоми дӯстӣ” барномаи рангини фарҳангӣ гузаронида шуд.

Бояд гуфт, ки Фестивали дӯстии ҷавонони ҷумҳурӣ дар ноҳияи Рӯдакӣ то рӯзи 4-уми май идома меёбад.