Бо ташаббуси Кумитаи кор бо ҷавонон ва варзиши назди Ҳукумати кишвар, 12 ноябр, бахшида ба таҷлили Рӯзи Президенти Ҷумҳурии Тоҷикистон дар муассисаи таҳсилоти миёнаи умумии №55-и ноҳияи Шоҳмансури шаҳри Душанбе ҳамоиши гирандагони стипендияи Президентӣ таҳти унвони “Ҷавонон - пайрави Пешвои миллат” баргузор гардид.

Дар ҳамоиш гирандагони стипендияҳои Президентӣ аз шаҳру ноҳияҳои Вилояти Мухтори Кӯҳистони Бадахшон, вилоятхои Суғду Хатлон, шаҳри Душанбе ва шаҳру ноҳияҳои тобеи марказ дар умум 165 нафар иштирок намуданд.

Аҳтам Абдуллозода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, зимни суханронии хеш дар ибтидо кулли иштирокчиёни ҳамоиш ва дар симои онҳо тамоми ҷавонони кишварро бахшида ба Рӯзи Президенти Ҷумҳурии Тоҷикистон ва ба истифода супоридани агрегати нахустини НБО “Роғун” сидқан муборакбод намуданд.

“Пешвои муаззами миллат барои ватани мо ҷиҳати нигоҳдории сулҳу суботи кишвар, таъмини шароити арзандаи иҷтимоии сокинони ҷумҳурӣ, насли ояндасози ҷомеа ҷидду ҷаҳд, заҳмату талошҳо ва хизматҳои басо бузург кардаанд. Беҳтарин арзишҳои инсонӣ, сифати накӯ,шараф, номусу мардонагӣ ва дасту дили пок доштани Пешвои миллат мусоидат бар он кард, ки мо мардуми саодатманди тоҷик шоҳиди рӯйдодҳои воқеан ҳам таърихӣ, дастовардҳое, ки садсолаҳо умеду орзуяшон мекардем, ба истиқлолияти ҳам озуқаворӣ ҳам энергетикӣ дастёб гардиданамон мушарраф гардидем”, - иброз дошт дар идома Аҳтам Абдуллозода, раиси Кумитаи кор бо ҷавонон ва варзиш.

Номбурда ҳамчунин таъкид сохт, ки иқдомҳои наҷиб ва ғамхоронаи Пешвои миллат нисбат ба насли наврасу ҷавон аз рӯзҳои нахустини соҳибистиқлолии кишвар бараъло эҳсос гардида, ба хотири рӯҳбаланд намудани наврасону ҷавонон ва бо мақсади таъмини таҳсилоти муносиби ҳар яки онҳо як қатор имтиёзу имкониятҳои фаррох фароҳам оварда шуданд ва стипендияи Президентӣ низ яке аз рукнҳои муҳими дастгирии давлату Ҳукумат нисбат ба насли наврасу ҷавон мебошад, ки бо фармони дахлдори Президенти Ҷумҳурии Тоҷикистон таъин гардидааст ва ҳамасола ба беҳтарин наврасон супорида мешавад. Ин ибтикороти шоиста ба хотири беҳтар шудани сифати таҳсилот ва тайёр кардани насли соҳибихтисос равона шудааст ва имтиёзҳое, ки дар доираи он муқаррар гардидаанд, баҳри баланд бардоштани сифати дониши толибилмон ва ҳамчун пайрави асили Пешвои миллат дар ободу зебо гардонидани ватани азизамон саҳмгузор буданашон мусоидат хоҳад кард.

Ҳамоиши гирандагони стипендияи Президентӣ соли дуввум аст, ки аз ҷониби Кумитаи кор бо ҷавонон ва варзиш бо дастгирии бевоситаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон бо доираи васеи гирандагони стипендияи Президентӣ доир карда мешавад.

Гуфта шуд, ки аз соли сипаригардида, дар асоси Фармони Президенти Ҷумҳурии Тоҷикистон аз соли 2018 теъдоди гирандагони стипендияи Президентӣ 100 адад зиёд гардид, ки дар умум 400 нафар муҳассилини муассисаҳои таҳсилоти миёнаи умумӣ, ибтидоӣ ва миёнаи касбӣ сазовори номи баланду бошарафи гирандаи стипендияи Президентӣ гардиданд.

Дар идома таъкид гардид, ки дар назди Кумитаи кор бо ҷавонон ва варзиш бо ҷалби гирандагони стипендияҳои Президентӣ Маҳфили доимамалкунандаи “Стипендиатҳои ҷавон” муддати ду сол аст, ки фаъолият намуда истодааст. Гирандагони стипендияи Президентӣ бо пешниҳоди идеяҳои навин ва бо дастгирии Кумитаи кор бо ҷавонон ва варзиш чорабиниҳои гуногуни илмӣ - назариявӣ, фарҳангӣ - фароғатӣ, оммавию варзишӣ ва сайёҳиро мунтазам дар шаҳру ноҳияҳои кишвар доир менамоянд.

Раиси Кумитаи кор бо ҷавонон ва варзиш дар интиҳои қисмати расмии чорабинӣ дар фазои тантанавӣ шаҳодатномаҳои гирандагони стипендияҳои президентиро дар соли 2018-2019 ба ғолибони озмунҳо барои дарёфти стипендияи президентӣ тақдим намуданд.

Аз ҷониби иштирокчиёни ҳамоиш дар идома муроҷиатномаи гирандагони стипендияҳои президентӣ ба самъи ҳозирин расонида шуда, сипас барномаи фарҳангӣ бо иштироки санъаткорони ҷавон пешкаши ҳозирин гардонида шуд.

Ба таъкиди масъулин дар доираи ҳамоиши мазкур чорабиниҳои фарҳангӣ, тамошои мавзеъҳои фарҳангиву фароғатии шаҳри Душанбе ва намоиши театрӣ аз ҷониби ҳунармандони Театри давлатии ҷавонон ба номи М.Воҳидов баргузор хоҳанд гашт.

Бо қаноатмандӣ гуфта шуд, ки таъсис ёфтани стипендияи Президентӣ ва равона гардидани дигар ғамхориҳо дар ин самт намунаи олии таваҷҷуҳу ғамхории Ҳукумати мамлакат ба насли ҷавони ояндасоз мебошад. Пас, имрӯз ҷавононро зарур аст, ки ҷавобан ба ин ҳама дастгириҳо илму ҳунар омӯхта, бо ҳисси баланди худшиносиву худогоҳии миллӣ, зиракии сиёсӣ ва маърифати баланди ҳуқуқӣ ҷиҳати пешрафти кишвари худ, таҳкими ваҳдати миллӣ ва истиқлолияти давлатӣ ва боз ҳам беҳтару бештар муаррифӣ намудани ватани азизи хеш – Тоҷикистон дар арсаи байналмилалӣ саҳмгузор бошанд.

Беҳрӯз ХОЛМУРОДОВ,
Наҷиба МУРОДБЕКОВА, “ҶТ”