Мақомоти иҷроияи ҳокимияти давлатии ноҳияи Рӯшони Вилояти Мухтори Кӯҳистони Бадахшон бинобар сабаби таваҷҷуҳи зиёди аҳолии мамлакат ба озмуни ҷумҳуриявии “ТАРАННУМИ ВАТАН” ва ҷалби бештари ҷавонон ба ватандӯстиву боло бурдани ҳисси худшиносии шаҳрвандони мамлакат, тасмим гирифтааст, ки ин озмунро сарпарастӣ кунад.

Тавре Алишер Шоҳмансуров, роҳбари дастгоҳи раиси ноҳияи Рӯшон гуфт: “Онҳо омодаанд, барои ҳавасманд кардани 4 ғолиби дигари озмун 4 ҳазор сомонӣ (ба ҳар нафар 1000 сомонӣ) ҷудо намоянд”.

Аз ин пас, ғолибони озмуни ҷумҳуриявии “ТАРАННУМИ ВАТАН” ба тартиби зайл қадрдонӣ хоҳанд шуд:

БАРОИ ҶОЙИ 1 – НОУТБУК;

БАРОИ 2 ҶОЙИ 2 – ПЛАНШЕТ;

БАРОИ 3 ҶОЙИ 3 – ТЕЛЕФОНИ МОБИЛӢ;

Барои 4 иштирокчии фаъол, ки аз ҷониби комиссияи озмун холҳои бештарро ба даст меоранд - 4 ҳазор сомонӣ (ба ҳар нафар 1000 сомонӣ);

Ҳамчунин, ба 10 нафар иштирокчии фаъоли озмун соати ҳушманд (смарт часы).

Ёдовар мешавем, ки Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо Муассисаи давлатии рӯзномаи “Ҷавонони Тоҷикистон” ба муносибати Рӯзи ҷавонони Тоҷикистон ва дар доираи Моҳвораи ҷавонон озмуни ҷумҳуриявиро зери унвони “ТАРАННУМИ ВАТАН” эълон кардаанд.

Мақсад аз баргузории озмун боло бурдани ҳисси худшиносии ҷавонон, тарғиб ва тарбияи эҳсоси ватандӯстӣ дар замири ҳар як фарди кишвар, ифтихор аз истиқлоли давлатӣ ва кашфи истеъдодҳои ҷавон мебошад.

Шарти иштирок дар озмун чунин аст:

Иштирокчиёни озмун метавонанд дар дилхоҳ гӯшаи табиати ватан бо телефони ҳамроҳи худ (ё дигар дастгоҳҳои наворбардорӣ) шеър, тарона ё сурудеро дар васфи ватан замзама намуда, онро ба унвонии рӯзнома ирсол намоянд. Мо маводҳои ирсолнамудаи иштирокчиёнро танзим намуда, дар гурӯҳҳои фейсбукӣ ва ютубии рӯзнома ҷой медиҳем.

Барои муайян кардани ғолибон овоздиҳӣ (шарҳ - комментария), бештар мақбул донистани корбарон (лайк) ва бознашр (поделится) дар гурӯҳҳои фесбукӣ ба назар гирифта шуда, инчунин аз ҳисоби намояндагони Кумитаи кор бо ҷавонон ва варзиши назди Ҳукумати кишвар, Иттифоқи нависандагони Тоҷикистон, Донишкадаи давлатии фарҳанг ва санъати Тоҷикистон ба номи Мирзо Турсунзода, Консерваторияи миллии Тоҷикистон ба номи Талабхӯҷа Сатторов ва Муассисаи давлатии рӯзномаи “Ҷавонони Тоҷикистон” комиссияи махсус ташкил карда мешавад. Инчунин барои тақаллуб нашудан дар гузоштани лайк аз ҷониби корбарони фейкӣ (ғайривоқеӣ) ва сар назадани норозигӣ миёни иштирокчиён дар комиссия аз ҳисоби мутахассисони IT намоянда ҷалб карда мешавад.

Синну соли иштирокчиён бояд аз 14-сола боло бошад.

Озмуни мазкур аз 15-уми апрел то 15-уми май доир гардида, дар арафаи Рӯзи ҷавонони Тоҷикистон зимни як маросими тантанавӣ ҷамъбаст хоҳад шуд.

Телефон барои тамос ва ирсоли маводҳо тариқи телеграм: 988230391, 934747586.