Конфронси ҷумҳуриявӣ ба муносибати Рӯзи ҷавонон ва Рӯзи ҷаҳонии футбол

Имрӯз дар толори Китобхонаи миллии Тоҷикистон дар доираи нақша – чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба ифтихори Рӯзи ҷавонони Тоҷикистон ва Рӯзи ҷаҳонии футбол конференсияи ҷумҳуриявӣ доир гардид.

Дар конференсия Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Орзу Ҳамидиён, мушовири бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, Маликшо Неъматзода, муовини якуми раиси Ҳизби Халқии Демократии Тоҷикистон ва намояндагони идораҳои гуногуни давлатӣ иштироку суханронӣ намуданд.

Инчунин, дар кори конфронс роҳбарони вазорату идораҳои дахлдор, ташкилоту муассисаҳо, ҷоизадорони Ҷоизаи ба номи Исмоили Сомонӣ, гирандагони Стипендияи президентӣ, олимону муҳаққиқони ҷавон, варзишгарони муваффақ, собиқадорони соҳаи кор бо ҷавонон, волонтёрон, ҷавонони фаъоли кишвар ва тариқи маҷозӣ аъзоёни маҳфили доимоамалкунандаи “Донишҷӯёни дар хориҷи кишвар таҳсилдошта” – и назди Кумита, дар маҷмӯъ 400 нафар ширкат карданд.

Дар ҷараёни баромадҳо нақш ва мавқеи ҷавонон дар рушди давлатдории миллӣ бориз арзёбӣ гардида, таъкид шуд, ки дар баробари ғамхориҳои Пешвои миллат месазад, ки ҷавонон мамлакат ҷавобан ба давлату миллати худ содиқу ғамхор бошад ва роҳ ба сӯйи ояндаи пурсаодатро пеш гиранд.

Дар охир барои фаъолияти пурсамар чанде аз фаъолону шахсиятҳои хизматнишондода ба ифтихори Рӯзи ҷавонони Тоҷикистон ва Рӯзи ҷаҳонии футбол бо медалҳои сарисинагӣ ва сипосномаҳо қадрдонӣ гардиданд.

“ҶТ”