Табрикоти раиси Кумитаи кор бо ҷавонон ва варзиши назди Ҳукумати
Ҷумҳурии Тоҷикистон Аҳтам Абдуллозода бахшида ба Рӯзи ҷавонони Тоҷикистон

Ҷавонони саодатманду хушиқбол, ояндагони Ватан, пайравони Пешвои миллат, дӯстони азизам.

Ҳамасола дар Тоҷикистони озоду соҳибистиқлоли мо рӯзи 23 май ҳамчун Рӯзи ҷавонон таҷлил мегардад. Ба ин муносибат ҳамаи шумо, ҷавонони кишвари азизамонро табрик мегӯям.

Мо ифтихор мекунем, ки имрӯз ҷавонони мо дар дигаргунсозиҳои ҷомеаи навин фаъолона иштирок намуда, дар муаррифии давлатамон ва баланд бардоштани парчами Тоҷикистон дар арсаи ҷаҳонӣ нақши шоиста доранд.

Боиси хушнудист, ки аксари ҷавонони мо бо эҳсоси гарми ватандӯстӣ, донишу малакаи муосир ва хислатҳои ҳамидае, ки хоси миллати қадимаи мо мебошад, ояндаи Тоҷикистонро ба ҷомеаи башар ба таври шоиста муаррифӣ мекунанд.

Имрӯзҳо мо шоҳиди ҳолем, ки баъзе аз афроди носипосу намакношинос, аз хони мо хурданд, нушиданд, обод шуданд, ному нон ёфтанд ва имрӯз бошад ин ободиву ин оромиро нодида мегиранд.

Ҳизбу ҳаракатҳои гумроҳи террористӣ аз надоштани ҷаҳонбинии илмӣ ва динӣ, нодуруст истифода намудани шабакаҳои иттилоотӣ (интернет), нодида гирифтани самараи истиқлолият дар мамлакат, бепарвоӣ ва бетарафии бархе аз аъзои ҷомеа, алалхусус ҷавонон истифода намуда, дар байни онҳо тарғиботу ташвиқот мебаранд, то мақсадҳои ғаразноки худро амалӣ созанд. Намунаи ин ҳамон сару садоҳои беасоси ба ном ватандорон аст, ки аз хориҷи кишвар бо чашми тангу дили сиёҳ пешрафту рушди кишвари тозаистиқлолро намехоҳанд. 

Дар чунин вазъият, масъулияти азими таърихӣ ва рисолати шаҳрвандии мо ва кулли пештозони ҷомеа аз он иборат аст, ки якпорчагӣ ва истиқлолияти Тоҷикистони азизамонро аз чунин паёмадҳои манфӣ эмин нигоҳ дорем. Зеро вазъи ҷаҳони муосир ниҳоят мураккаб буда, он ба ҷаҳони таблиғ ва паҳн намудани ғояҳои тундгароӣ, густариши хатарҳои экстремизму терроризм, коҳиши маънавии ҷомеа ва падидаҳои дигари номатлуб табдил ёфтааст. Моро зарур аст, ки дар чунин вазъияти мураккабу нозук аз як гиребон сар барорем, фирефтаву "мурид"-и пешвоёни ношинос нашавем ва ба хотири ободиву осудагӣ, сулҳу оштӣ ва ояндаи дурахшони ин замини муқаддас - Тоҷикистони азиз доимо омодаи хизмат бошем. 

Устуворӣ ва садоқати ҷавонон барои давлати навбунёд заминаи хуб мегузорад. Пешвои муаззами миллат борҳо таъкид намудаанд, ки давлати мо Тоҷикистон соҳибистиқлол, демократӣ, дунявӣ ва ягона аст. Дар баробари ин аксарияти мардуми Тоҷикистон пайрави дини мубини ислом буда, дорои фарҳанги ғанӣ ва урфу одатҳои миллӣ мебошанд. Ҷавонони кишвари мо бояд қадри ин хоку оби сарзамини биҳиштосоро донанд ва ҳаргиз нагузоранд, ки миллати ҳазорҳо сол ранҷдида аз ин музаффариятҳое, ки имрӯзҳо ба даст овардааст, маҳрум гардад.

Боиси хушнудист, ки Ҳукумати мамлакат бо роҳбарии Асосгузори сулҳу ваҳдати миллӣ, Пешвои миллат, Президенти маҳбубамон, муҳтарам Эмомалӣ Раҳмон тамоми шароитро барои насли ояндасозу ватанпараст ҷиҳати зиндагиву фаъолияти шоиста муҳайё сохтаанд. Имтиёзҳо дар таҳсил, кору фаъолият, дастовардҳои илмию варзишӣ ва монанди инҳо аз таваҷҷуҳи Пешвои миллат, муҳтарам Эмомалӣ Раҳмон ба ин қишри фаъоли ҷомеа маҳсуб меёбанд. 

Имрӯз Ҳукумати кишвар ба нерӯи тавонои ҷавонон эътимод дорад, пешниҳоду ибтикороти онҳоро дастгирӣ менамояд ва ҷиҳати ҳавасманд гардонидан ва муҳайё сохтани шароити хуби зиндагӣ ва таҳсил барои онҳо ҳамаи тадбирҳои заруриро роҳандозӣ мекунад.

Дар баробари ин, ба Модар - Ватан хизмати содиқона намудан, марзу буми онро ҳимоя кардан ва дар ҳимояи манфиатҳои давлату миллат ҳушёр будан қарзи фарзандии ҳар як ҷавони бонангу номус ва далеру матин мебошад.

Шумо, ҷавонони азиз, бояд хуб дарк намоед, ки ояндаи Тоҷикистони соҳибистиқлол дар дасти шумост.

Бори дигар, ҳамаи шумо, насли ояндасози Ватанро ба муносибати Рӯзи ҷавонон таҳният гуфта, бароятон саломатӣ ва дар корҳои ободониву созандагии Ватани азизамон - Тоҷикистон пирӯзиҳои нав орзу менамоям.

Рӯзи ҷавонон муборак, фарзандони хушиқболи Тоҷикистони соҳибистиқлол!