5-уми август оид ба ҷамъбасти фаъолияти нимсолаи аввали соли ҷории Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар толори ин ниҳод нишасти матбуотӣ доир гашт.

Шабнам Раҳимзода, муовини якуми раиси кумита зимни нишаст аз фаъолияти нимсолаи ин ниҳод натиҷагирӣ карда, иброз намуд, ки дар самти кор бо ҷавонон дар давраи ҳисоботӣ 23055 чорабинӣ бо фарогирии 1 976 713 нафар ҷавонон ва аҳли ҷомеа баргузор гардидааст.

- Дар самти ба шуғли пурмаҳсул ва ба ҷойи кори муносиб ҷалб намудани ҷавонон дар шашмоҳаи якуми соли 2024 аз ҷониби Кумита ва сохторҳои тобеи он дар маҷмӯъ 786 чорабиниҳои мухталиф, аз ҷумла курсҳои омӯзишии ҳунармандӣ, семинар - машваратҳо бо муҳоҷирони меҳнатӣ ва оилаҳои онҳо, мизҳои мудаввар бо фарогирии 32650 нафар ҷавонон ва аҳли ҷомеа гузаронида шуд, - гуфт Шабнам Раҳимзода.

Номбурда ҳамчунин қайд кард, ки вобаста ба фароҳам овардани шароит ҷиҳати гирифтани таҳсилоти сифатнок барои ҷавонон ва таъмини рушди ихтироъкорию эчодкории онҳо аз ҷониби Кумита, сохторҳои маҳаллӣ ва ташкилотҳои система давоми шашмоҳаи якуми соли 2024, 854 чорабинӣ бо иштироки 122 153 нафар чавонони касбу кори гуногун баргузор карда шуд.