Бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон Фестивали ҷумҳуриявии "Дӯстии ҷавонон" роҳандозӣ гардида, дар доираи он 120 ҷавон аз саросари кишвар ба шаҳру ноҳияҳои вилояти Суғд, аз ҷумла Айнӣ, Исфара, Истаравшан, Панҷакент ва Хуҷанд сафар намуданд.

Дар доираи Фестивал баргузории ҳамоишу конференсияҳо, семинарҳо, тамошои ҷойҳои таърихию сайёҳӣ, барномаҳои идонаю фарҳангӣ таҳти унвони “Шоми ҷавонӣ”, бозиҳои варзишӣ ва дигар чорабиниҳо доир мегардад.

Дар рӯзи аввал иштирокчиёни Фестивали "Дӯстии ҷавонон" ба ноҳияи Айнӣ ташриф оварда, аз майдони Парчами давлатии Ҷумҳурии Тоҷикистон, гулгашти Шоири халқии Тоҷикистон Гулназар Келдӣ, Қасри фарҳанги ба номи Нақибхон Туғрал, Осорхонаи таърихӣ-кишваршиносии бахши фарҳанги МИҲД-и ноҳия, Маҷмааи “Боғистон” дар деҳаи Сангистон, Маҷмааи Нақибхон Туғрал ва хона-музейи шоир дидан карданд.

Пас аз ин, ҳамоиши ҷавонон доир гардид. Дар ҳамоиш Зулфиқор Гулаҳмадозода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Равшан Раҳимзода, раиси ноҳияи Айнӣ, Исматзода Бахтиёр, сардори Раёсати кор бо ҷавонон ва варзиши вилояти Суғд ва ҷавонони фаъол иштирок доштанд.

Гуфта шуд, ки ҷавонон неруи пешбарандаи ҷомеа буда, маҳз аз сатҳи дониш, ҷаҳонбинӣ ва масъулияти онҳо ояндаи дурахшони кишвар вобаста аст.

Ёдовар мешавем, ки Фестивали "Дӯстии ҷавонон", ки бахшида ба Наврӯзи байналмилалӣ ташкил гардидааст, аз 31 март то 5 апрел дар шаҳру ноҳияҳои вилояти Суғд идома меёбад.