Чун анъана ВМКБ нақшаи даъват ба сафи Қувваҳои Мусаллаҳи Ҷумҳурии Тоҷикистонро дар рӯзи аввал иҷро кард. Ба ин муносибат, имрӯз дар маркази маъмурию фарҳангии вилоят, шаҳри Хоруғ маросими гусели ҷавонони синни даъват ба хизмати ҳарбӣ баргузор гардид.

Чорабинии мутантан бо роҳпаймоии қишри васеи ҷомеа, аз ҷумла даъватшудагон, падару модар, ҷавонон, муҳассилини муассисаҳои илмии вилоят, кормандони идораю муассисаҳо, сохторҳои қудратӣ ва мақомотҳои ҳифзи ҳуқуқ, сокинон ва сарбозони қисмҳои низомӣ оғоз гардида, аз Майдони Парчами давлатӣ то Боғи фарҳангию фароғатии шаҳри Хоруғ идома кард.

Алишер Мирзонабот, раиси ВМКБ зикр кард, ки фаъолияти хуби масъулини мақомоти давлатӣ, фаъолони ҷамъиятӣ, падару модарон ва масъулияти баланди худи даъватшавандагон имкон фароҳам сохт, ки сифати кор дар ин самт сол ба сол беҳтар гардида, аксарияти ҷавонон ихтиёрӣ омодагии худро барои шомил шудан ба сафи Қувваҳои Мусаллаҳи Ҷумҳурии Тоҷикистон ҷиҳати адои рисолати шаҳрвандӣ изҳор доранд.

Зикр гардид, ки айни замон, дар тамоми қисмҳои низомии кишвар барои хизмати ҷавонон шароити зарурӣ муҳайё карда шудааст. Ҷавонон дар рафти адои хизмати ҳарбӣ имконият пайдо мекунанд, ки дониш ва малакаҳои муосири ҳарбиро соҳиб гардида, аз ҷиҳати ҷисмонӣ ва маънавию ахлоқӣ неруманд гарданд. Илова бар ин, эҳсоси ватандорӣ дар замири ҷавонон масъулиятшиносӣ ва ҷасоратро мустаҳкам сохта, маҳз дар ин мактаби мардонагӣ онҳо хуб дарк мекунанд, ки ватандӯстӣ бо амал ва рафтор нишон дода мешавад. Аз сӯи дигар, дар ин мактаби мардонагӣ муҳаббат ба падару модар ва оила афзуда, ҳурмати калонсолон, эҳтирому эътимод ба дӯсту ҳамхизмат дар ниҳоди ҳар як сарбоз маъво гирифта, сарбозон ҳамчун шахсият ба камол мерасанд.

- Мо аз ҷавонони ғаюру далер, содиқу ватандӯст, ки имрӯз ба сафи Қувваҳои Мусаллаҳ шомил мешаванд, даъват ба амал меоварем, ки дар ҳама ҳолату вазъият содиқона ба Ватану миллат хизмат намоянд. Ҳар як дақиқаи хизматро сарфакорона истифода бурда, бо риояи талаботи оинномавӣ, аз худ намунаи ибрати сарбози вафодорро нишон диҳанд. Дасти ҳамхизматро дар вазъияти мушкил гирифта, барои дифои марзу буми ватани маҳбуб ва ҳаёти осоиштаи миллат хизмати аҳлона кунанд,-таъкид кард раиси вилоят.

Дар идома, падару модар ва даъватшавандагон низ баромад намуда, миннатдориашонро ба Пешвои миллат муҳтарам Эмомалӣ Раҳмон ва Ҳукумати Ҷумҳурии Тоҷикистон барои фароҳам сохтани шароити мусоид дар қисмҳои ҳарбӣ баён намуданд.

Баъди маросимӣ нонгазон, наваскарон зери навои сурудҳои ватандӯстона ба сафи Қувваҳои Мусаллаҳ гусел шуданд.

Садоншо ҶАНОБИЛШОЕВ,
"ҶТ"