Субҳи имрӯз дар майдончаи назди шаршараи Наврӯзгоҳи пойтахт ба муносибати рӯзи байналамилалии олимпӣ машқҳои пагоҳирӯзи гузаронида шуд. Он бо ташаббуси Кумитаи миллии олимпии Ҷумҳурии Тоҷикистон ва дар ҳамкорӣ бо Кумитаи кор бо ҷавонон ва варзиши назди Ҳукумати ҷумҳурӣ ташкил карда шуд. Дар ин чорабинӣ ҳудуди 5000 нафар сокинону меҳмонони пойтахт, донишҷӯён, варзишгарон, намояндагони вазорату кумита ва идораҳо, ташкилоту созмонҳо ва васоити ахбори омма иштирок варзида, аз ин ҷашнро ба хушӣ истиқбол намуданд.



Назарзода Ризо, муовини аввали раиси Кумитаи кор бо ҷавонон ва варзиш қабл аз шуруи машқҳо тамоми иштирокдорони ин чорабиниро хушомадед намуда, рӯзи байналмилалии ҳаракати олимпиро ба яко яки эшон табрик намуданд. Зимни суханрнии хеш аз ҷумла қайд кард, ки “Ин иди варзишӣ яке аз муҳимтарин воқеъоти замони мо гардида, бозиҳои олимпӣ чун қисми ҷудонашавандаи ҳаракати ҷаҳонии олимпӣ варзишгарону мухлисони тамоми оламро муттаҳид месозанд. Ва мақсад аз дар чунин сатҳи воло таҷлил намудани ин ҷашн аз ҷониби мақомотҳои дахлдор низ оммавӣ гардонидани варзиш ва наздик намудани ҳаракати олимпӣ миёни ҳама қишрҳои аҳолист.”



 Сипас аз ҷониби Мавзуна Чориева дорандаи медали Бозиҳои олимпӣ барқияи табрикотии президенти Кумитаи байналмилалии олимпӣ Томас Бах қироат карда шуд.

Бо ҳамин машқҳои пагоҳирӯзӣ оғоз гардида, иштирокдорон ҳудуди як соат ба тамринҳо машғул гардиданд. 

Пас аз хотимаи тамринҳо ба беҳтарин иштирокдорон сертификати Кумитаи байналмилалии олимпӣ тақдим карда шуд.



Сипас бо ифодаи эҳтиром ва сипос ба таърихи пурғановати халқи тоҷик ҷавонону варзишгарон дар майдони “Дӯстӣ”-и пойтахт ба пояи муҷассамаи Шоҳ Исмоили Сомонӣ гулчанбар гузоштанд.

Ёдовар мешавем, ки чунин чорабиниҳо дар саросари кишвар ҷараён гирифтанд.