Дар доираи сафари кории Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба минтақаи Рашт ва ба истиқболи 35-солагии Истиқлоли давлатии Ҷумҳурии Тоҷикистон дар ноҳияи Нуробод се иншооти нави варзишӣ ба истифода дода шуд.

Иншооти мазкур дар деҳаҳои Шербегиён ва Улфатободи Ҷамоати деҳоти Сафедчашма ва деҳаи Хулозии Ҷамоати деҳоти Муҷихарфи ноҳияи Нуробод бунёд гардида, барои фароҳам овардани шароити мусоиди машқу тамрини наврасону ҷавонон ва рушди намудҳои гуногуни варзиш дар маҳал пешбинӣ шудаанд.

Дар деҳаҳои Шербегиён ва Улфатобод ду толори варзишии гӯштин ба истифода дода шуд. Толорҳо бо саҳми соҳибкорон, шахсони саховатпеша ва сокинони деҳа бунёд гардида, барои тамрин ва омодагии варзишгарони наврасу ҷавон имкониятҳои бештар фароҳам меоранд.

Ҳамзамон, дар деҳаи Хулозии Ҷамоати деҳоти Муҷихарф майдончаи варзишии футбол мавриди истифода қарор гирифт. Иншооти варзишӣ бо саҳми соҳибкорон, шахсони саховатпеша ва ҷавонони деҳа бунёд шуда, барои машқу тамрини дӯстдорони футбол ва ҷалби наврасону ҷавонон ба ин намуди варзиш хизмат хоҳад кард.

Дар маросими ба истифода додани иншооти варзишӣ намояндаи Ҳукумати Ҷумҳурии Тоҷикистон, вазири кишоварзии Ҷумҳурии Тоҷикистон Ҳакимзода Қурбон, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Шокирзода Муҳаммадтолиб ва раиси ноҳияи Нуробод Солеҳзода Фатҳуддин Ҳусен иштирок намуданд.
Зимни шиносоӣ бо шароити иншооти нав таъкид гардид, ки рушди инфрасохтори варзишӣ, фароҳам овардани имкониятҳои мусоид барои машқу тамрини наврасону ҷавонон ва ҷалби онҳо ба варзишу тарзи ҳаёти солим аз самтҳои муҳими сиёсати иҷтимоии давлат ба ҳисоб меравад.

Яҳё МАҲМАДНАБИЕВ, “ҶТ”