ВАРЗИШ
Шанбе 13 Июл 2024 09:50
10437
Рӯзи 6-уми июн шуморе аз мухлисони тими миллии футболи Тоҷикистон барои ҳаводории мунтахабчиёни кишвар вориди шаҳри Уммони Урдун гардиданд. Аммо ормону умедвории мардум дар 90 дақиқа аз байн рафт.

Тими миллии футболи Тоҷикистон, ки дар бозии даври панҷуми марҳилаи дуюми интихобии Ҷоми ҷаҳон-2026 аз дастаи мунтахаби Урдун бо ҳисоби 0:3 шикаст хӯрд, аз ҳаққи ширкат дар марҳилаи сеюми қаҳрамонии ҷаҳон-2026 ва роҳхат ба Ҷоми Осиё-2027 маҳрум гашт.

Бозии гурӯҳи “G” байни тимҳои миллии Урдуну Тоҷикистон шаби панҷшанбеи 6-уми июн дар Варзишгоҳи миллии пойтахти Урдун – шаҳри Уммон доир гардид.

Дар нимаи аввали дидор футболбозони тоҷик фаъол буданд ва чандин лаҳзаҳои хуби голзаниро ба вуҷуд оварданд, аммо муваффақ нашуданд. Ҳатто Рустам Соиров ҳолати як ба як бо дарвозабонро самаранок истифода набурд. Ин ҳолате буд, ки ҳатто як футболбози ҳаваскор онро метавонист бо гол анҷом диҳад.

Истифода набурдани имкониятҳои 100-фоизаи футболбозони тоҷик дар нимаи аввали вохӯрӣ сару садоҳоро дар шабакаҳои иҷтимоӣ ба миён овард. Дар ин баробар, варзишдонони кишвар низ назари хешро баён намуда, омили бо гол анҷом надодани имкониятҳои хубро дар хатти ҳамла надоштани нишонзани бомаҳорат медонанд. Фирдавси Хурсанд зимни таҳлили рақобати Урдун-Тоҷикистон назари хешро чунин баён дошт:

“Дар айни рушди футболи ватанӣ ва аз фурсатҳои 1000-фоиза истифода бурда натавонистан дар бозии муҳимтарин нишонаи он аст, ки мо ҳоло ҳам таҷрибаи кофӣ надорем. Дар хатти ҳамла ва дар лаҳзаҳои ҳассос пойҳои футболбозони мо меларзид. Аз ин бармеояд, ки мо дар мавқеъҳои зарурӣ футболбозони лозимӣ надорем”.

Омили дигари берабт бозӣ кардани тими мунтахаби кишварро дар рақобати ниҳоят муҳим Фирдавси Хурсанд ба беҳунарии мураббии тими миллии кишвар рабт медиҳад.

“Ҳама чиз ба назар хуб менамояд, аммо чизе намерасад. Баъзан давиданҳои беҳудаи онҳо касро асабӣ месозад ва баъзан корҳое мекунанд, ки ҳайрон мешавӣ. Сармураббӣ ба шеваи мардумӣ - “нашуд””, - меафзояд Фирдавси Хурсанд.

Иммомбек Шодибекзод таҳлилгари дигари масоили варзишии кишвар бохти сангини мунтахаби кишварро шикасти ормони чандинсолаи мардум дар роҳи футбол медонад, ки мусоидтарин имкониятро дар роҳи расидан ба Ҷоми ҷаҳон аз каф раҳо карданд.

“Бидуни шакку шубҳа метавон гуфт, ки бозии рӯзи 6-уми июн дар сафар муқобили Урдун барои миллипӯшони мо аз муҳимтарин рақобат дар таърихи муосири футболи тоҷик буд. Зеро бозии сафарӣ зидди урдуниҳо бароямон аз ду ҷиҳат арзишманд ва тақдирсоз буд: ҳам роҳхати мустақими иштирок дар Ҷоми Осиё-2027 зери даст меомад ва ҳам мунтахаби мо баҳри роҳхати ормонии Ҷоми ҷаҳон-2026 рақобатҳоро дар даври сеюми марҳилаи интихобӣ идома медод. Ҳардуи ин натиҷа албатта, ки ақаллан дар сурати мусовии сафарӣ ҳам зери даст меомад, вале мутаассифона мо дар гурӯҳи худ натавонис-тем зинаи дуввумро ишғол намоем, зеро бо ҳисоби бузург дучори шикаст шудем. Бозии охирини даври аввали марҳилаи интихобӣ албатта зидди мунтахаби Покистон бароямон ҳарчанд сайри сабук ва оромкунанда аз он талхии бохт буд, мо дигар боз ҳам ба сатҳи мунтахабҳои Бангладешу Муғулистон поин мефароем. Аз ҷониби дигар, агар дигарбора ба худи он ормонҳои амалиношуда, яъне ба рафти бозӣ зидди Урдун баргардем, албатта, ки чандинбораҳо изҳори таассуф мекунем. Дар Ҷоми Осиё-2024 ҳарчанд Урдун дар роҳи шикаст додани тими мо сахт азоб кашида буд, ин бозӣ танҳо дар нимаи аввали рақобат арақи ҷабин рехт. Бисёриҳо тахмин мезананд, ки урдуниҳо қасдан дар чилу панҷ дақиқаи аввал ақибнишинӣ карданд, зеро медонистанд, ки аллакай аз нафасҳои нахусти нимаи дуюми бозӣ меҳмонон худ нафасгир мешаванд”.

Акнун меравем ба нимаи дуюми рақобат. Нимаи дуюми дидор бо бартарии комили мизбонон сурат гирифт. Чунин ба назар мерасид, ки қувваву энергияи футболбозони тоҷик ба сифр баробар шуда бошад. Ҳамин буд, ки танҳо дар 45 дақиқаи нимаи дуввум ба дарвозаи меҳмонон се голи беҷавоб заданд. Голҳоро Алӣ Олван (дақиқаи 51-ум), Язан Ал-Наймат (68) ва Иброҳим Саъдӣ (90+4) ба самар расонданд. Дар рафти бозӣ мушоҳида гардид, ки на танҳо хатти ҳамлаи тими мунтахаби кишвар, балки хатти дифоъ ҳам ба тағйироти ҷиддӣ ниёз дорад, чун дар дақиқаи 68-ум Язан Ал-Наймат аз иштибоҳи ҳимоятгари тими мунтахаби Тоҷикистон Манучеҳр Сафаров истифода намуда, як ҳолати начандон хатарнокро бо гол анҷом дод.

Бобо Холмуродзода, шореҳи рақобати Урдун-Тоҷикистон иллати бохт аз Урдунро дар наомӯхтани таҷрибаи рақиб медонад:

“Бохт аз Урдун ва роҳ наёфтан ба даври сеюми бозиҳои интихобии Ҷоми ҷаҳон-2026-ро ба чанд омил рабт додан мумкин аст. Дар ибтидо айб дар худи мост. Дар қонуни нонавиштаи футбол гуфта шудааст, ки футбол аз ҳуштак то ҳуштаки довар аст. Агар хотиратон бошад, дар Душанбе муқобили Урдун дар дақиқаи 89-ум гол мезанем ва дар 90+3 аз як хатои кучак гол сар медиҳем. Ба назари ман маҳз ҳамин вохӯрӣ ҳалкунанда буд барои дар гурӯҳ дуюм шудани дастаи мо.

Омили дуввуми бохти дастаи мо аз лиҳози тактикӣ буд. Мураббиёни мо хуб дарк мекарданд, ки футболбозони мо пурра 90 дақиқа дар як сатҳ бозӣ карда наметавонис-танд. Бурди мураббии марокашии Урдун дар он буд, ки қувваи дастаашро дар ду қисми бозӣ ҷудо карда, муваффақ шуд.

Саввум, мутаассифона, ҳоло футболи мо аз надоштани ҳамлагари ботаҷриба танқисӣ дорад. Чанд сол пеш дарвозабон мушкили асосӣ буд, ҳоло ҳамлагар. Ҳамчунин, хуб интихоб накардани ҳайат аз ҳисоби бозингарони таҷрибадор. Ягон футболбоз ҳам аз захира омада бозии моро тағййр дода наметавонад. Бисёр ҷойи таассуф, ки орзуи деринаи рафтани дастаи мо ба марҳилаи дигар барбод рафт”.

Омили дигари бохт аз тими милли Урдун ин ҷалб нагаштани футболбозони бомаҳорате, ки метавонанд ҳар замон рафти бозиро тағйр диҳан ба ҳисоб меравад. Ин нуқтаро Имомбек Шодибекзод низ зимни пурсиши мо тасдиқ кард:

“Эҳсос нашудани хунсардӣ дар вуҷуди ҳамлаварони мунтахаб ва каҷпо будани чанде аз онҳо суолҳоро ба миён мегузорад, ки чаро Шекиледазеи гурҷӣ нафарони хундарҷӯше ба мисоли Шериддин Бобоев ва Далер Шарифов аз Металлурги Бекободро ба тими миллӣ даъват накард. Илова бар ин то дақиқаи шастум албатта, ки умедҳо дар вуҷуди кулли мухлисони футболпарвари тоҷик гарм буданд, вале аллакай баъди ин фурсатҳо даҳшату фалокат ба маънии том сари мунтахаби мо рехт. Ҳам иштибоҳот аз ҷониби бозигарони таърифӣ зиёд шуданду ҳам системаи муштараки бозӣ ба мисоли гули баҳорӣ ба якборагӣ пажмурда шуд. Аз ҷониби дигар бо шухиву нимшухӣ метавон гуфт, ки кош футбол шаст дақиқа идома мекард ва мо сарбаланду сар боло аз майдон берун мешудем. Зеро ба истиснои шарафмандии хоссаи дар Ҷоми Осиё-2024 дар бештари бозиҳо имкониятҳои ҷисмониву равонии бозигарони мо фаротар аз дақиқаи шастуми рақобат аз дарди музмини хеш садо баланд мекунад”.

Дар ин ҷо метавон ба назари таҳлилгарон розӣ шуд. Мутаассифона, омили асосии ғолиб шудан дар мусобиқаҳои ҷиддӣ, яъне омӯхтани нуқтаи заъфи рақиб дар мо нест. Дар хатти ҳамла Рустам Соиров ва Шервонӣ Мабадшоев натавонистанд хуб бозӣ кунанд, чун таҷрибаи ниҳоят кам дар хатти ҳамларо доранд. Дар ин рақобат сармураббӣ бозингар иваз накард, танҳо дар даҳ дақиқаи то охири рақобат Шаҳром Самиевро ба хатти ҳамла овард, ки дигар кор аз кор гузашта буд ва ӯ ҳам натавонист ба тими мунтахаб кӯмак расонад. Чунин ба назар мерасид, ки Урдун қисми аввалро барои мунтахабчиёни тоҷик “туҳфа” кард, ҳам хаста кард ва ҳам омӯхт. Дар қисми дуюм бошад, тақдири бозиро пурра ба нафъи худ ҳал намуд.

Бояд гуфт, ки тибқи ваъдаи президенти Федератсияи футболи Тоҷикистон, агар тими мунтахаби кишвар дар рақобат бо Урдун ғалаба мекард, соҳиби 100 ҳазор доллари амрикоӣ мегардид. Дар ҳолати мусовӣ кардан футболбозони тоҷик метавонистанд, соҳиби 50 ҳазор доллар гарданд, аммо на ин шуду на он.

Ҳамин тариқ, тими миллии Урдун зери роҳбарии сармураббӣ Ҳусейн Амута, мутахассиси марокашӣ, ки дар ҷадвали гурӯҳи “G” бо касби 10 имтиёз дар зинаи дуюм қарор дорад, пешакӣ ба марҳилаи сеюми қаҳрамонии ҷаҳон-2026 роҳ ёфта, инчунин соҳиби роҳхат ба Ҷоми Осиё-2027 гардид.

Вале тими миллии Тоҷикистон бо роҳбарии сармураббӣ Гела Шекиладзе, мутахассиси гурҷӣ, дар бозӣ муқобили Урдун аз се имтиёз бенасиб монд ва аз ҳаққи ширкат дар даври сеюми қаҳрамонии ҷаҳон-2026 ва роҳхат ба Ҷоми Осиё-2027 маҳрум шуд. Мунтахаби Тоҷикистон бо касби 5 имтиёз дар гурӯҳи худ дар ҷойи сеюм аст.

Бозии дигари гурӯҳи “G” миёни тимҳои миллии Покистон ва Арабистони Саудӣ, ки 6-уми июн дар Варзишгоҳи Ҷинноҳи шаҳри Исломобод доир гардид, бо ҳисоби 3:0 ба суди меҳмонон хотима ёфт.

Дар ҳамин ҳол дар ҷадвали гурӯҳи “G” мунтахаби Арабистони Саудӣ бо касби 13 имтиёз дар ҷойи аввал аст. Саудиҳо пешакӣ ба марҳилаи сеюми мусобиқот роҳ пайдо карда, соҳиби роҳхат ба Ҷоми Осиё-2027 гардиданд.

Тими Покистон, ки бидуни имтиёз дар зинаи охирини гурӯҳ ҷойгир шудааст, аз ҳаққи ширкат дар даври сеюми қаҳрамонии ҷаҳон-2026 ва роҳхат ба Ҷоми Осиё-2027 маҳрум гашт.

Бозии дигари ин гурӯҳ миёни дастаҳои мунтахаби Арабистони Саудӣ ва Урдун сурат гирифт. Аммо натоиҷи ин ду бозии охирин мавқеи дастаҳоро дар ҷадвали гурӯҳ тағйир надод.

Марҳилаи дуюми интихобии қаҳрамонии ҷаҳон-2026 дар қораи Осиё бо иштироки 36 дастаи мунтахаб дар нуҳ гурӯҳ ҷараён дорад.

Дастаҳое, ки дар гурӯҳҳо ҷойҳои якуму дуюмро мегиранд, ба марҳилаи сеюми мусобиқот роҳ меёбанд ва ҳамзамон соҳиби роҳхат ба қисми ниҳоии Ҷоми Осиё-2027 мешаванд.

Ба ин тартиб, аз рӯи натиҷагирии панҷ даври мусобиқот аз гурӯҳи “А” - Қатар, аз гурӯҳи “В” - Ҷопон, аз гурӯҳи “С” - Кореяи Ҷанубӣ, аз гурӯҳи “D” - Умон, аз гурӯҳи “Е” - Эрон ва Узбекистон, аз гурӯҳи “F” - Ироқ, аз гурӯҳи “G” - Арабистони Саудӣ ва Урдун, аз гурӯҳи “Н” - Имороти Муттаҳидаи Арабӣ ва Баҳрайн, аз гурӯҳи “I” - Австралия ва Фаластин ба марҳилаи сеюми интихобии қаҳрамонии ҷаҳон-2026 роҳ ёфта, инчунин соҳиби роҳхат ба қисми ниҳоии Ҷоми Осиё-2027 гардиданд.

Хулоса, тими мунтахаби Тоҷикистон бо он рақобати беобуранге, ки муқобили Урдун шоми 6-уми июн дошт, ормони “Орзу-2026”-ро ба “Орзу-2030” бурд.

Эзоҳи худро нависед



Рамзҳо дар расм