Имрӯз ба муносибати Рӯзи Парчами давлатии Ҷумҳурии Тоҷикистон дар ВМКБ роҳпаймоии оммавӣ баргузор гардид.

Дар он зиёда аз 9 ҳазор сокинони вилоят, аз ҷумла омӯзгорон ва хонандагони муассисаҳои таҳсилоти ҳамагонӣ, кормандони идораю муассисаҳои давлатӣ, муассисаҳои маорифу тандурустӣ, собиқадорон, фарҳанг, занон, ҷавонон, муҳассилини муассисаҳои олии вилоят, афсарону сарбозони қисмҳои ҳарбӣ бо муқаддасоти миллӣ дар даст, аксу мусаввараҳои қаҳрамонони миллат, шиору овезаҳои ватандӯстона аз назди Боғи ғалаба то майдони Парчам ва муқаддасоти миллӣ роҳ паймуданд.

Зимни ифтитоҳи чорабинӣ раиси ВМКБ Мирзонабот Алишер Худобердӣ ҳамагонро бо Рӯзи Парчами давлатии Ҷумҳурии Тоҷикистон, ки таърихи ҳазорсоларо тай намуда, умеду орзу ва омоли наслҳои имрӯзаву ояндаи миллати ориёии тоҷикро таҷассум намуда, ба сифати омили муҳими маънавии пайвандгари ҷамъияти Тоҷикистон ва умуман миллати мо баромад менамояд, табрику таҳният гуфт.

Зикр гардид, ки арҷ гузоштан ба рамзҳои давлатӣ, ин қадрдонӣ ва эҳтироми давлату давлатдории миллӣ, муқаддасоти миллӣ ва арзишҳои инсонӣ дониста мешавад. Дар ин росто, Парчами давлатӣ ҳамчун ифодакунандаи орзуву омоли халқи тоҷик дар қатори дигар муқаддасоти миллат арзиш ва ҷойгоҳи махсус дорад.

Таъкид гардид, ки Парчами давлатӣ рамзест, ки қудрати муттаҳидкунанда дорад ва дар қалби ҳар як шаҳрванд ғурури миллӣ ва эҳсоси гарми ватандориро бедор месозад. Бинобар ин, ҳифзи Парчам ва арҷгузорӣ ба он нишонаи ҳисси баланди миллӣ ва ватандӯстиву ватанпарастӣ мебошад.

Таъкид гардид, ҳар гоҳе ки ба Парчами баландафроштаи пойтахти Ватанамон - шаҳри Душанбе ва дигар шаҳру ноҳияҳо назар менамоем, аз парафшонии он фараҳманд гардида, дар сиришту ботини мо эҳсоси бузурги ифтихор аз давлату миллат, ҳисси ғуруру шодӣ аз ватандорӣ ва идроки баланди ҳувияти миллӣ ҷӯш мезанад.

- Моро зарур аст, ки бо мақсади боз ҳам афзун сохтани дастовардҳо ва таҳкиму тавсеа бахшидани ҷойгоҳ ва нақшу саҳми Тоҷикистон дар арсаи байналмилалӣ, аз ин беҳтару бештар меҳнат кунем. Соли оянда кулли тоҷикон 35-умин солгарди Истиқлоли Тоҷикистони азизро ҷашн мегиранд. Аз он ҷумла, сокинони Бадахшон, дар ин росто то имрӯз бо мусоидати Ҳукумати Ҷумҳурии Тоҷикистон бо сохтани садҳо иншоот ва рушду такомули инфрасохтори кулли соҳаҳои хоҷагии халқи вилоят ба комёбиҳои беназир ноил шуданд. Дар ин масири бузург сиёсати хирадмандонаву созанда ва ҳидоятҳои мушфиқонаи Пешвои муаззами миллат роҳнамои мо буда, дар ҳамдастӣ мо неруи бузургем, ки таҳти парафшонии Парчами миллӣ ба ҳадафҳои наҷибамон дар шоҳроҳи созандагию бунёдкорӣ бирасем, - афзуд раиси вилоят.

Дар идомаи чорабинӣ аз ҷониби аҳли санъати вилоят барномаи ҷолиби фарҳангӣ манзури ҳозирин гардонида шуд.

Садоншо ҶАНОБИЛШОЕВ, “ҶТ”