Дар заминаи дастуру супориш ва ҳидояту роҳнамоиҳои Пешвои миллат муҳтарам Эмомалӣ Раҳмон оид ба рушди соҳаи ҷавонон ва варзиш, таҳкими фаъолияти сохторҳои соҳавӣ, бо мақсади омӯзиши вазъи сиёсати давлатӣ дар маҳал, ташкили чорабиниҳои фарҳангию варзишӣ, баргузории ҳамоишҳо бо гирандагони Стипендияи президентӣ, инчунин, таҳкими ҳамоҳангсозии фаъолияти муассисаҳои варзишӣ гурӯҳи кории Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба ВМКБ сафар намуд.

Зимни сафар, ки аз ноҳияи Дарвоз оғоз гардид, масъалаҳои вобаста ба татбиқи сиёсати давлатии ҷавонон ва варзиш дар маҳал мавриди омӯзиш қарор гирифта, ҷиҳати таҳкими ҳамкорӣ ва баланд бардоштани самаранокии фаъолият ба сохторҳои соҳавӣ ёрии методию машваратӣ расонида шуд.
Нахуст, дар ноҳия гурӯҳи корӣ бо роҳбарии муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Шокирзода Муҳаммадтолиб аз қисмҳои ҳарбӣ дидан карда, бо афсарону сарбозон ҳамсуҳбат шуданд.
Нақши ҷавонон дар ҳифзи Истиқлоли давлатӣ, саҳми онҳо дар таҳкими амнияту суботи ҷомеа, аҳамияти тарбияи ҳарбӣ-ватандӯстӣ, ҷалби ҷавонон ба хизмати ҳарбӣ, инчунин рушди тарбияи ҷисмонӣ ва варзиш ҳамчун омили муҳими солимии ҷомеа меҳвари суҳбат қарор
гирифт.
Гуфта шуд, ки ҷавонони кишвар бояд бо ҳисси баланди масъулиятшиносӣ, садоқат ба Ватан, эҳтиром ба арзишҳои миллӣ ва иштироки фаъолона дар ҳаёти ҷамъиятӣ барои пешрафт ва шукуфоии Тоҷикистони соҳибистиқлол саҳми арзанда гузоранд.
Сипас, ба афсарону сарбозони фаъол барои хизматҳои шоиста, интизоми намунавӣ, дастовардҳои варзишӣ ва иштироки фаъолона дар корҳои ҷамъиятӣ сипосномаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва туҳфаҳои хотиравӣ супорида шуд.
Дар идома дар толори варзишии “VASTAN” бо мураббиён ва варзишгарон вохурӣ баргузор гардид.
Зимни мулоқот масъалаҳои рушди варзиш миёни наврасон, тарғиби тарзи ҳаёти солим, баланд бардоштани маҳорати варзишӣ ва омодасозии ҷавонон барои иштирок дар мусобиқаҳои сатҳи ҷумҳуриявию байналмилалӣ мавриди баррасӣ қарор гирифтанд.
Зикр гардид, ки давлату Ҳукумати мамлакат ба рушди соҳаи варзиш ва фароҳам овардани шароити мусоид барои ҷавонону наврасон таваҷҷуҳи махсус зоҳир намуда, барои тарбияи насли солиму ватандӯст тамоми имкониятҳоро фароҳам овардааст.
Ба варзишгарони наврас ҷиҳати ноил гардидан ба дастовардҳои баланди варзишӣ, муаррифии шоистаи Ватан дар арсаи байналмилалӣ ва идомаи машқу тамринҳои мунтазам тавсияҳои муфид дода шуда, иддае аз онҳо бо туҳфаҳои хотиравӣ ва сипосномаи Кумитаи кор бо ҷавонон ва варзиш сарфароз шуданд.
Гурӯҳи корӣ ҳамчунин дар ноҳия рафти мусобиқаи варзишии волейболро бо усули “деҳа ба деҳа” тамошо карданд.
Тибқи иттилои масъулин сабқати мазкур бо мақсади рушди варзиш миёни аҳолӣ, таҳкими тарзи ҳаёти солим, ҷалби бештари ҷавонон ба машғулиятҳои мунтазами варзишӣ ва таҳкими дӯстиву ҳамдигарфаҳмӣ байни сокинони деҳаҳо роҳандозӣ карда шудааст.
Дар идома тибқи нақшаи чорабиниҳо ҳамоиш бо иштироки гирандагони Стипендияи президентӣ таҳти унвони “Ҷавонон – пайрави Пешвои миллат” доир гардид.
Дар рафти ҳамоиш хонандагони фаъол барои шаш моҳи таҳсил маблағи стипендия дар ҳаҷми 6048 сомонӣ дарёфт намуданд.
Дар навбати худ ҷавонон аз дастгириҳои пайвастаи давлату Ҳукумат, бахусус Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон изҳори миннатдорӣ намуда, ваъда доданд, ки бо баҳои аъло таҳсил намуда, ба Ватан хизмат мекунанд, то ба ин боварӣ сазовор бошанд.
Зимни мулоқот бо масъулини кор бо ҷавонон ва варзиш ва ҷавонон дар деҳаи Рузвайи Ҷамоати деҳоти Қалъаи Хум масъалаҳо оид ба ободонии маҳал, баланд бардоштани ҳисси масъулияти шаҳрвандӣ, иштироки фаъолонаи ҷавонон дар корҳои созандагиву бунёдкорӣ ва саҳмгузорӣ дар рушди деҳа мавриди баррасӣ қарор гирифтанд.
Гуфта шуд, ки дар шароити имрӯза ҳар як сокини деҳа, бахусус ҷавонон бояд барои тозагии муҳити зист, ҳифзи арзишҳои миллӣ, ободонии маҳал ва пешрафти ҷомеа саҳми арзандаи худро гузорад. Ҳамзамон, иштирокчиён ҷиҳати тақвияти корҳои ободонӣ, нигоҳдории иншооти ҷамъиятӣ ва рушди ташаббусҳои созанда пешниҳодҳои худро иброз намуданд.
Дар идома, бо мақсади баланд бардоштани самаранокии фаъолияти сохторҳои маҳаллии Кумитаи кор бо ҷавонон ва варзиши назди Ҳукумати Ҷумҳурии Тоҷикистон фаъолияти бахши кор бо ҷавонон ва варзиш, инчунин муассисаи давлатии “Мактаби варзишӣ”-и ноҳия санҷида шуд.
Зимни санҷиш ҳолати иҷрои нақшаи чорабиниҳо, пешбурди ҳуҷҷатгузорӣ, фаъолияти тарбиявию варзишӣ, ҷалби ҷавонон ба машғулиятҳои варзишӣ ва татбиқи сиёсати давлатии ҷавонон мавриди омӯзиш қарор гирифт.
Ҳамзамон, ба ҳайати роҳбарият ва масъулини сохторҳои маҳаллӣ вобаста ба беҳтар намудани фаъолияти ташкилӣ, тақвияти корҳои тарғиботию иттилоотӣ, дуруст ба роҳ мондани ҳуҷҷатгузорӣ ва иҷрои саривақтии дастуру супоришҳо ёрии методии амалӣ расонида шуд.
Таъкид гардид, ки фаъолияти сохторҳои маҳаллӣ бояд ба баланд бардоштани сатҳи маърифату худогоҳии ҷавонон, рушди варзиш ва тарғиби тарзи ҳаёти солим равона гардида, барои татбиқи босамари сиёсати давлатии ҷавонон ва варзиш тадбирҳои мушаххас амалӣ карда шаванд.
Сафари гурӯҳи кории Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба дигар шаҳру ноҳияҳои вилоят идома дорад.

Садоншо ҶАНОБИЛШОЕВ, “ҶТ”