Дар ҷараёни баргузории Форуми байналмилалии сайёҳии “Хатлон – сарзамини тамаддунҳо ва сайёҳӣ” раиси вилояти Хатлон Давлаталӣ Саид суханронӣ намуда, соҳаи сайёҳиро яке аз самтҳои афзалиятноки иқтисодиёти миллӣ арзёбӣ намуд.

Раиси вилоят сараввал ташрифи меҳмононро ба ин сарзамини бостонӣ хайрамақдам гуфта, таъкид кард, ки бо шарофати сиёсати созандаи Пешвои миллат муҳтарам Эмомалӣ Раҳмон соҳаи сайёҳӣ рушд ёфтааст.

- Мавзеи Чилдухтарон на танҳо бо табиати мафтункунанда ва кӯҳҳои афсонавии худ, балки бо таърихи қадимӣ ва меҳмоннавозии хоси сокинонаш метавонад ба яке аз марказҳои асосии сайёҳии ҷаҳонӣ табдил ёбад. Мақомоти иҷроияи ҳокимияти давлатии вилояти Хатлон омодааст, ки барои соҳибкорону сармоягузорони соҳаи сайёҳӣ тамоми шароитҳои заруриро муҳайё созад, - изҳор дошт Давлаталӣ Саид.

Ҳамзамон, раиси вилоят иброз дошт, ки вилояти Хатлон бо таърихи куҳан, мероси бойи фарҳангӣ, ёдгориҳои нодири бостонӣ ва табиати зебову рангоранг дорои имкониятҳои васеи рушди сайёҳӣ мебошад: "Мо саъй менамоем, ки ин ганҷинаи бебаҳоро ба ҷаҳониён муаррифӣ намуда, барои рушди ҳамкориҳои байналмилалӣ ва ҷалби сармоягузорӣ дар соҳаи сайёҳӣ заминаи мусоид фароҳам оварем".

Барномаи фарҳангии форум бо ҳунарнамоии ҳунармандони Театри мусиқӣ ‑мазҳакавии ба номи Ато Муҳаммадҷонови шаҳри Бохтар ба роҳ монда шуд, ки садои фалак ва рақсҳои миллӣ ба чорабинӣ шукӯҳи хосса бахшида, таваҷҷуҳи меҳмонони хориҷиро ҷалб намуд.

Инчунин дар ҳавои кушод намоиши ҳунарҳои мардумӣ, либосҳои миллии чакан ва гӯшаи таомҳои кӯҳистон гузаронида шуд.
Мавриди зикр аст, ки чорабинии мазкур рӯзҳои 4-5 июн баргузор мегардад, ки ҳадафи он муаррифии имкониятҳои сайёҳии минтақа мебошад.

Фарзонаи УМАРАЛӢ, “ҶТ”