Дар шаш моҳи аввали соли 2025 аз ҷониби Хадамоти иҷрои назди Ҳукумати Ҷумҳурии Тоҷикистон 57,3 миллион сомонӣ маблағи алимент ба фоидаи модару кӯдак ситонида шудааст.

Дар ин бора 5-уми август Аҳтам Абдуллозода, сардори Хадамоти иҷрои назди Ҳукумати Ҷумҳурии Тоҷикистон зимни нишасти хабарӣ иттилоъ дод.

Ӯ гуфт, ки ин маблағ нисбат ба ҳамин давраи соли гузашта 36% зиёдтар мебошад.

- Дар ин давра, ба Хадамот 5 ҳазору 816 адад истеҳсолоти иҷро вобаста ба ситонидани маблағи алимент ворид гардидааст, - зикр кард номбурда.

Ба иттилои Хадамот, барои саркашӣ аз пардохти алимент нисбати 156 нафар қарздорон аз ҷониби мақомоти прокуратура парвандаҳои ҷиноӣ оғоз гардидааст. 410 нафар қарздорон барои сари вақт пардохт накардани алимент ба ҷавобгарии маъмурӣ кашида шудаанд.

Ҳамзамон, қайд гардид, ки дар шаш моҳи аввали соли 2025, 594 ҳолати манъи тарки манзил ва 149 ҳолати кӯчонидани иҷрочиён ба қайд гирифта шудааст. Аз шумораи умумии чунин иҷроҳо, 82 ҳолат бо муваффақият иҷро гардидааст.

Ф. УМАРАЛӢ, “ҶТ”