Ӯ роҳбарест оқил ва хирадманд. Сарварест ғамхору мушфиқ ва дурандеш. Абармардест нотакрору шахсест таърихсоз. Роҳбарест арзандаи ҳама гуна мукофотҳову ситоишҳо. Ва ниҳоят Президентест арзанда мақомашро ва намунаи ибратест дигар роҳбаронро. Ин аст, ки 16-уми ноябрро номидаанд Рӯзи Президенти Ҷумҳурии Тоҷикистон. Бо нишони эҳтиром ба ҷонфидоиҳои Пешвое чун Эмомалӣ Раҳмон.

Чун дар арафаи Рӯзи Президенти Ҷумҳурии Тоҷикистон қарор дорем, шинохти чанде аз ҷавонони кишварро дар мавриди Пешвои миллат пурсон шудем, ки фишурдаи онро пешкаши хонанда месозем.


Комрон САФАР, хабарнигори рӯзномаи “Ҷумҳурият”:

- Пешвои миллат муҳтарам Эмомалӣ Раҳмон, бешубҳа, барои мо - насли ҷавон идеалу қаҳрамонанд, ки дар мушкилтарин шароит ба хотири ором кардани Ватани худ ҷонфидоӣ карданд. Ба ҳамагон солҳои аввали соҳибистиқлолӣ маълум аст, ки дар кадом шароит қарор доштем. Маҳз азму талоши пайгиронаи Пешвои миллат кишварро аз вартаи нобудӣ наҷот дода, мақому манзалати Тоҷикистонро дар арсаи ҷаҳон боло бурд. Дар самтҳои иқтисодӣ, иҷтимоӣ, сиёсӣ ва фарҳангӣ дигаргуниҳои куллӣ ба вуҷуд омада, мардум ба ҳаёти осоишта баргашт.

Хушбахтона, имрӯз Тоҷикистони азизи мо дар арсаи байналмилалӣ мақому мартабаи хос дорад. Ин ҳама боз ҳам пайванд мехӯрад ба шахсияти Ҷаноби Олӣ, ки ба ҳайси Пешво моро ба оламиён шиносонданд. Фарҳангу тамаддуни бостонии моро ба халқҳои дунё ошно намуданду исбот карданд, ки решаҳои ин миллат аз умқи таърих рустааст. Аз ин рӯ, халқ Пешвояшро симои миллат медонад, ба Президент эътимод кардаву даст ба даст Тоҷикистони навинро бунёду обод месозад ва гузашта аз ин, Сарвари давлати мо нисбат ба тақдири мардумони ҷангзадаи олам, ки қурбонии манфиатҳо мешаванд, бетараф нестанд.

Пешвои миллат дар Тоҷикистон сулҳро асосу бунёд гузошта бошанд, сафири сулҳи ҷаҳонанд. Тавре аз вазъи ҷаҳон ҳамагон огоҳанд, дар 13 кишвар ҷанг асту ҳамарӯза ҳазорҳо нафар мардуми бегуноҳ кушта мешавад. Пешвои миллат, ки дар замирашон сулҳҷӯист, дар Самити оянда дар шаҳри Ню-Йорки ИМА пешниҳод намуданд, ки тавассути қатъномаи махсуси Созмони Милали Муттаҳид “Даҳсолаи таҳкими сулҳ ба хотири наслҳои оянда” қабул карда шавад. Чунин иқдоми нек ва пешниҳоди оқилона барои бартараф намудани ҷангҳои хатарноки ҷаҳонӣ саривақтӣ буда, аз он дарак медиҳад, ки сулҳ арзиши бузург дорад ва ҷаҳони имрӯз ба он сахт ниёзманд аст.

Аз ин лиҳоз, муҳтарам Эмомалӣ Раҳмон барои халқи тоҷик, бахусус ҷавонон намоди як абармард ва қаҳрамонеанд, ки рисолаташон сулҳхоҳиву сулҳҷӯӣ, ободгариву бунёдкорист.

Пас, месазад аз ин бузургмард дарси ибрат гирифту пайрави содиқашон буд.


Фархунда ҒАЙБУЛЛОЕВА, барандаи Шоҳҷоизаи озмуни “Тоҷикистон-Ватани азизи ман” дар соли 2024:

- Дар хурдсолӣ вақте исми Пешвои миллатро аз ман пурсон мешуданд, бо як хушҳолӣ Эмомалӣ Раҳмон мегуфтам. Баробари ба забон овардани номашон пеши назарам як абармарди сулҳдӯст, марди меҳрубону донишманд ва қаҳрамон намоён мешуд. Вақте бузургтар шудам, бароям бештар маълум гашт, ки воқеан Пешвои миллат муҳтарам Эмомалӣ Раҳмон фардест сулҳҷӯву ваҳдатофар ва роҳбари хубест тоҷиконро. Ин шахсияти нотакрор аз лаҳзаи аввали ба сари қудрат омаданашон тавонист, ки бо тамоми қувва ва идроки худ Тоҷикистони пора - порагаштаи моро ҷамъ сохтаву сулҳу суботро дар кишвар барқарор созанд. Мо - ҷавонон аз доштани Пешвои худ ифтихор дорему пайравашон ҳастем.


Шуҳрат НАСРИДДИНОВ, корманди ҶСК НБО “Роғун”:

- Аз нигоҳи ман Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон як шахсияти бузурги таърихӣ ва наҷотбахши миллати тоҷик мебошанд. Маҳз талошҳои шабонарӯзии ҳамин қаҳрамони нотакрор буд, ки ҳанӯз аз вақти раиси Шурои Олии Ҷумҳурии Тоҷикистон таъин шуданашон, миллати тоҷикро аз вартаи нобудшавӣ наҷот бахшиданд. Соли 1993 Қувваҳои Мусаллаҳи Ҷумҳурии Тоҷикистонро таъсис доданд ва соли 1994 барои бори нахуст бо тариқи раъйпурсии умумихалқӣ Президенти Ҷумҳурии Тоҷикистон интихоб шуданд.

Заҳмату ҷонфидоиҳои Пешвои миллат буд, ки имрӯз миллати моро дар арсаи байналмилалӣ ҳамчун як давлати фарҳангӣ ва таърихӣ мешиносанд. Мо, насли ҷавони кишвар чун пайравони ҳақиқии ин абармард миннатдории худро ба Президенти Ҷумҳурии Тоҷикистон муҳтарам Эмомалӣ Раҳмон мерасонем, ки баҳри мо - ҷавонон тамоми шароитҳои заруриро муҳайё намудаанд ва мо дар Ватани азизи худ бо ихтисоси худ кор ва фаъолият намуда истодаем.

Таҳияи Гулафшон КАРИМОВА, “ҶТ”