4 феврали соли 2025 бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар толори Филармонияи давлатии Тоҷикистон ба номи Акашариф Ҷӯраев “Маросими ҷоизасупории соҳаи кор бо ҷавонон дар соли 2024” аз рӯйи 8 номинатсия ва қадрдонии ғолибони озмунҳои эълоннамудаи Кумита дар соли 2024 баргузор мегардад.

Дар ин бора маркази матбуоти Кумитаи кор бо ҷавонон ва варзиш хабар додааст.

Бино ба иттилои манбаъ, дар маросими ҷамъбасти соҳаи кор бо ҷавонон ҷиҳати қадршиносии хизматҳои шоиста ва ҷавонмардии ҷавонон дар назди ҷомеа ва давлат, ҷасорату фидокорӣ дар вазъияти ҷангӣ, ҳолатҳои таҳдидкунанда ба амнияти миллату давлат ва адои қарзи ҳарбӣ ва хизматию шаҳрвандӣ барои дастгирӣ, ҳавасмандгардонӣ, тарбияи ватандӯстӣ ва таҳкими ҳувияти миллии ҷавонон ҷоизаи “Шуҷоат ва ҷавонмардӣ” таъсис дода шудааст, ки имсол аз миёни беш аз 40 нафар довталаб, 12 нафар беҳтаринҳо аз ҷониби комиссияи босалоҳият муайян шуда, ин ҷоиза дар фазои тантанавӣ ба онҳо супорида мешавад.

Соли 2024 аз ҷониби Кумита озмун барои дарёфти Ҷоизаи Кумитаи кор бо ҷавонон ва варзиш дар самти адабиёт, санъат, меъморӣ, рӯзноманигорӣ, барномасозӣ, техника, технология ва инноватсия эълон гардид. Аз миёни 81 нафар довталаб, 20 нафар беҳтаринҳо муайян ва ғолибон дар маросими ҷоизасупории соҳаи кор бо ҷавонон қадрдонӣ мегарданд.

Инчунин, дар маросими ҷоизасупории соҳаи кор бо ҷавонон қадрдонии нафарони дигар аз рӯи номинаҳои “Беҳтарин сохтори соҳаи кор бо ҷавонон дар соли 2024”, “Беҳтарин муассисаи тарғиботӣ дар самти кор бо ҷавонон”, “Беҳтарин корманди соҳаи кор бо ҷавонон”, “Барандаи гранти ҳукуматӣ миёни ташкилоти ҷамъиятии кор бо ҷавонон дар самти ватанпарастии ҷавонон дар соли 2024”, “Беҳтарин волонтёри соли 2024”, “Беҳтарин шуъбаи кор бо ҷавонони муассисаҳои таҳсилоти олии касбӣ дар соли 2024”, “Беҳтарин сохтор дар самти тарбияи ватандӯстии ҷавонон дар соли 2024” дар назар дошта шудааст.

Ҳамасола аз ҷониби Кумита озмун барои дарёфти стипендияи Президенти Ҷумҳурии Тоҷикистон миёни донишҷӯёну хонандагони муассисаҳои таҳсилоти миёнаи умумӣ, ибтидоӣ ва миёнаи касбӣ доир гардида, 3000 нафар беҳтаринҳо тибқи квотаи муқарраргардида аз рӯйи минтақаҳо ғолиб муайян гардида, давоми 9 моҳи соли хониш бо идрорпулӣ қадрдонӣ карда мешаванд. 10 нафар ғолибони озмуни мазкур низ дар ин маросим қадрдонӣ карда хоҳад шуд.

Дар маросим ҳамчунин барномаи фарҳангӣ бо иштироки як гурӯҳ сарояндаҳои машҳури кишвар аз ҷониби Оркестри давлатии симфонӣ пешбинӣ гардидааст.

“ҶТ”