24 апрел Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари расмӣ ба Италия дар шаҳри Рим бо мудири иҷроияи Ширкати “ВиБилд” (WeBuild) Пиетро Салини масъалаҳои ҳамкорӣ оид ба рафти сохтмони Неругоҳи барқи обии “Роғун” муҳокима карданд.

Дар ин бора аз Хадамоти матбуоти Президенти мамлакат иттилоъ доданд.

Ба иттилои манбаъ Президенти кишвар муҳтарам Эмомалӣ Раҳмон оид ба ҷараёни сохтмони сарбанди неругоҳ андешаронӣ намуданд. Роҳбарияти ширкати “ВиБилд”, ки яке аз пудратчиён дар сохтмони Неругоҳи барқи обии “Роғун” мебошад, ба Сарвари давлат муҳтарам Эмомалӣ Раҳмон дар бораи иҷрои уҳдадориҳо ва рафти корҳои сохтмонӣ маълумот дода изҳори итминон кард, ки ширкат тамоми имкониятҳои худро барои дар муҳлатҳои муқарраргарида анҷом додани нақшаҳои корӣ сафарбар хоҳад кард.

Ҷонибҳо зимни вохӯрӣ, инчунин, оид ба дигар масъалаҳои ҳамкорӣ, тезонидани корҳо ва истифодаи босамар аз имкону захираҳои мавҷуда табодули андеша карданд.

Ёдовар мешавем, ки ширкати “ВиБилд” аз соли 2018 инҷониб ба сохтмони сарбанди асосии Неругоҳи барқи обии “Роғун” машғул аст. Ин ширкат дар Неругоҳи барқи обии “Роғун” корхонаи сангу шағалбарорӣ низ дорад, ки мувофиқи маълумотҳо дар як соат ба миқдори 3000 тонна масолеҳ истеҳсол менамояд. Ширкат аз соли 2023 истеҳсоли маводи полоишии андозаашон 0-10, 0-40 ва 5-40 миллиметрро низ ба роҳ мондааст, ки дар қисмҳои поёнӣ ва болоии ядрои сарбанди асосии Неругоҳи барқи обии “Роғун” истифода мегардад.