Дар нимсолаи аввали соли 2025 дар ҷумҳурӣ аз ҷониби занон 227 ҳолати худкушӣ ва суйиқасд ба қайд гирифта шудааст, ки нисбат ба ҳамин давраи соли гузашта 5 ҳолат зиёд мебошад. Аз ин шумора 173 ҳолати худкушӣ ва 54 ҳолати суйиқасд ба ҷон мебошад.

Бунафша Файзиддинзода, раиси Кумитаи кор бо занон ва оилаи назди Ҳукумати кишвар 1 август зимни нишасти хабарии ин ниҳод бо зикри ин нукта ҳамчунин таъкид дошт, ки ҳодисаи худкушӣ ва суйиқасд дар ин давра аз ҷониби занон 107 ҳолат ва аз ҷониби ноболиғдухтарон 30 ҳолат ба қайд гирифта шудааст. Ин рақамҳо нишон медиҳанд, ки шумори ҳолатҳои худкушӣ ва суйиқасд ба ҷон аз ҷониби занон коҳиш ва аз ҷониби ноболиғдухтарон афзоиш ёфтааст. Дар соли гузашта 110 зан ва 24 ноболиғдухтар ба худкушӣ ва суйиқасд ба ҷон даст зада буданд.

Бунафша Файзиддинзода гуфт, ки омилҳои худкушӣ ва суйиқасд ба ҷон гуногунанд:

- Дар ин давра худкушӣ ва суйиқасд ба ҷон аз сабаби касалиҳои руҳӣ 69 ҳолат, шароити вазнини моддӣ 3 ҳолат, муноқишаи оилавӣ 25 ҳолат қайд гардидааст. Боқимонда ба сабабҳои номаълум рабт дода мешавад.

Сайёраи ҚИЁМИДДИН, "ҶТ"