Имрӯз дар вилояти Хатлон нақшаи даъвати баҳории ҷавонон ба сафи Қувваҳои Мусаллаҳи Ҷумҳурии Тоҷикистон дар рӯзи аввал пурра иҷро гардида, ҷавонони зиёд бо ҳисси баланди ватандӯстӣ барои адои хизмати ҳарбӣ сафарбар шуданд.

Дар ин бора хадамоти матбуоти раиси вилояти Хатлон хабар додааст.

Бино ба иттилои манбаъ, бори дуюм аст, ки вилояти Хатлон дар таърихи соҳибистиқлолии кишвар тавонист нақшаи даъватро дар рӯзи аввал комилан иҷро кунад. Ин нишондиҳанда аз омодагии баланди ҷавонон ва тақвияти корҳои тарбиявию ватандӯстӣ миёни онҳо шаҳодат медиҳад.

Ба муносибати ин рӯйдоди муҳими сиёсиву иҷтимоӣ дар шаҳри Бохтар роҳпаймоии ботантана ва чорабинии фарҳангӣ баргузор гардид.

Навдаъватшавандагон аз назди комиссариати ҳарбии вилоят бо парчамҳо ва шиорҳои ватандӯстона раҳсипори варзишгоҳи Донишгоҳи давлатии Бохтар ба номи Носири Хусрав шуданд. Дар ин роҳпаймоӣ садҳо ҷавонони ихтиёрӣ иштирок карда, омодагии худро барои ҳифзи марзу буми Ватан ба намоиш гузоштанд.

Тибқи иттилоъ, дар варзишгоҳ маросими бошукӯҳи гусели сарбозон доир гардид. Раиси вилояти Хатлон Давлаталӣ Саид дар ин чорабинӣ иштирок ва суханронӣ намуд. Раиси вилоят хизмат дар сафи Қувваҳои Мусаллаҳро яке аз марҳилаҳои муҳими ҳаёти ҳар як ҷавон дониста, таъкид кард, ки ин як мактаби ҷасорат, мардонагӣ ва садоқат ба Ватан мебошад.

Пас аз суханронии раиси вилоят маросими анъанавии нонгазон баргузор шуд. Модарону падарон бо чашмони пур аз ифтихор фарзандони худро барои адои хизмати ҳарбӣ гусел намуда, ба онҳо дуои нек доданд.

Баъди барномаи фарҳангӣ ҷавонон бо руҳияи баланд ва ифтихор аз Ватан барои адои хизмати ҳарбӣ раҳсипор гардиданд.