ҶОМЕА
Шанбе 22 Июн 2024 12:15
10385
28 майи соли равон дар шаҳри Душанбе бо иштироки Гулнора Ҳасанзода, вазири меҳнат, муҳоҷират ва шуғли аҳолии Ҷумҳурии Тоҷикистон, Рамазон Раҳимзода, вазири корҳои дохилии Ҷумҳурии Тоҷикистон, Владимир Колоколсев, вазири корҳои дохилии Федератсияи Россия ва намояндагони воситаҳои ахбори омма намояндагии Корхонаи воҳиди давлатии федеролии “Хадамоти шиноснома ва раводид”-и Вазорати корҳои дохилии Федератсияи Россия ифтитоҳ гардид.

Дар ин бора аз дафтари матбуоти Вазорати меҳнат, муҳоҷират ва шуғли аҳолии Ҷумҳурии Тоҷикистон хабар доданд.

Зимни ифтитоҳ гуфта шуд, ки бо ташаббуси Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар натиҷаи мулоқоту музокироти пай дар пайи роҳбарияти олии ҳарду кишвар ва намояндагони вазорату идораҳои дахлдори он барои дар амал татбиқ намудани муқаррароти Созишнома байни Ҳукумати Ҷумҳурии Тоҷикистон ва Ҳукумати Федератсияи Россия оид ба ҷалби муташаккилонаи шаҳрвандони Ҷумҳурии Тоҷикистон барои амалӣ намудани фаъолияти меҳнатии муваққатӣ дар ҳудуди Россия бобати бокортаъминкунӣ ва ҳифзи ҳуқуқу манфиатҳои шаҳрвандони Тоҷикистон чораҳои зарурӣ амалӣ мегардад.

Ҳадафи асосии таъсиси ин намояндагӣ анҷом додани чанд чорабинии омодагӣ, аз ҷумла санҷиши пеш аз сафар дар ҳудуди Тоҷикистон буда, акнун шаҳрвандони мо имкон доранд, ки дар дохили ҷумҳурӣ аз бақайдгирии изи ангушт ва санҷиши манъи вуруд ба ҳудуди Россия гузаранд. Ин барои омодагии минбаъда баҳри ҷалби муташаккилонаи онҳо ба фаъолияти меҳнатӣ мусоидат менамояд.

Таъкид шуд, ки Тоҷикистон барои ҷойгир намудани сохторҳои намояндагӣ дар бинои Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дафтарҳои корӣ ҷудо ва онҳоро таъмиру навсозӣ кард. Намояндагӣ ҷиҳати таъмини шароити мусоиди хизматрасонӣ ва сарфаи вақт барои нафароне, ки хоҳиши кор дар Россия доранд, мусоидат менамояд.

Ҳамзамон, дар доираи татбиқи муқаррароти Созишнома намояндагони вазорату идораҳои дахлдори ҳарду ҷониб барои дар муддатҳои наздик ба роҳ мондани гузаштани муоинаи тиббӣ, супоридани имтиҳонҳо, гирифтани маълумоти ибтидоӣ ва миёнаи касбӣ аз рӯйи барномаҳои Россия, ки барои гирифтани патент ва фаъолияти қонунии шаҳрвандони мо дар ҳудуди Россия заминаи ҳуқуқӣ фароҳам меорад, кор мебаранд.

Наҷиба МУРОДБЕКОВА, “ҶТ”

Эзоҳи худро нависед



Рамзҳо дар расм